အာဠာဝက မောင်ဗျာသ - ၁

Posted by Sayar Ann
ကျောင်းသားလေး မောင်ဗျာသ

တစ်နေ့သ၌ ကျေးတောရွာလေး တစ်ရွာ၏ အနောက်ဘက်တွင် တည်ရှိသော ပျဉ်ထောင် စာသင်ကျောင်းလေး အနီးရှိ စိန်ပန်းပင်ကြီး၏ အရိပ်အောက်တွင် လွယ်အိတ်လေးများအား ကိုယ်စီလွယ်ထားကြသည့် ကျောင်းသားလေး နှစ်ယောက်အား တွေ့ရလေ၏။ တစ်ယောက်သော ကျောင်းသားလေးမှာ ခေါင်းကို ပြောင်နေအောင် တုံးထားပြီး တစ်ယောက်သော ကျောင်းသားလေး မှာမူ မွေးတည်းကပင် ဆံပင် မညှပ်ခဲ့သည့်အလား လူနှင့်မလိုက်အောင်ပင် ၎င်း၏ ဆံပင်တို့မှာ ရှည်လျားနေသည်ကို တွေ့ရလေသည်။

ကျောင်းသားလေး နှစ်ယောက်၏ အနီးတွင် သာကူရောင်းသော အဒေါ်ကြီး တစ်ယောက်လည်း ရှိလေ၏။ ထိုအဒေါ်ကြီးသည် ထန်းလျက်ရည်များနှင့် ကျိုချက်ထားသော အတန်ငယ် ပူလောင်နေသည့် သာကူများအား စတီးပန်းကန်လုံးလေးများ အတွင်းသို့ ခပ်ထည့်ပြီးနောက် ဇွန်းကိုယ်စီတပ်ကာ ကျောင်းသားလေး နှစ်ယောက်အား ပေးလေ၏။ ထိုအခါ ဆံရှည်နှင့် ကလေးမှ ၎င်းအတွက် ပေးသော သာကူပန်းကန်အား လှမ်းယူလိုက်ပြီးနောက် မျက်နှာ ရွှဲ့လိုက်လေ၏။ ပြီးနောက် သာကူသည် အဒေါ်ကြီးအား -
“ဒေါ်အေးမေကြီး ကလည်းဗျာ။ သာကူ တစ်ကျပ်ဖိုးက နည်းတာပေါ့။ ကျုပ်ကို ထပ်ထည့်ပေးဦး”
ဟူ၍ အတွန့်တက်လေသည်။ ထိုအခါ သာကူသည် အဒေါ်ကြီးမှာ ဆံရှည်ကလေးအား “စားပြီးရင် အဆစ် ထပ်မတောင်းနဲ့တော့၊ မရတော့ဘူး” ဟုဆိုကာ သာကူ အနည်းငယ် ထပ်ထည့်ပေးလိုက်လေ၏။



ဆံရှည်ကလေးမှာ သာကူထပ်ထည့်ထားသည့် ပန်းကန်အား ဒေါ်အေးမေကြီးထံမှ လှမ်းယူလိုက်ပြီးနောက် ကတုံးလေးအား တစ်ချက် ကြည့်လိုက်ပြန်၏။ ကတုံးနှင့် ကလေးမှာမူ မည်သို့မျှ ပြောဆိုခြင်း မရှိဘဲ ခေါင်းကိုငုံ့ကာ ၎င်းအတွက် ရရှိသော သာကူပန်းကန်အား အေးဆေးစွာ သောက်နေသည်ကို တွေ့ရလေသည်။
“ဒေါ်အေးမေကြီး၊ ဖိုးကတုံး ထဲလည်း ထပ်ထည့်ပေးလိုက်ဦးဗျ”
ဟူ၍ သာကူသည် အဒေါ်ကြီးအား ဆံရှည်လေးမှ ပြောလိုက်ပြန်လေရာ ဒေါ်အေးမေကြီးလည်း ဖိုးကတုံး ပန်းကန်ကို ယူကာ သာကူ အနည်းငယ် ထပ်၍ ထည့်ပေးလိုက်ပြန်လေ၏။ ဤသို့နှင့် ကတုံးနှင့် ဆံရှည်လေးတို့သည် အရိပ်ကောင်းသော စိန်ပန်းပင်ကြီးအောက်တွင် သာကူ ပူပူများအား လေကလေးဖြင့် မှုတ်ကာ မှုတ်ကာ စားနေလျက် ရှိကြလေတော့၏။
+ + + + + + + + + + + + + + +

“ဟေ့ကောင် … ကတုံး၊ မင်း သာကူ ငါ့ကို ပေးစမ်း”
ကတုံးလေးထက် နှစ်ဆခန့် ထွားကြိုင်းဟန် ရှိသော ကျောင်းသား တစ်ယောက်မှ ကတုံးလေး ထံမှ သာကူပန်းကန်အား တောင်းယူ လိုက်ခြင်း ဖြစ်လေသည်။ ထိုအခါ သာကူသည် အဒေါ်ကြီးမှ …
“ဟဲ့ .. ငထွန်း၊ မင်း သောက်ချင်ရင် ဝယ်သောက်ပါ့လားကွယ့်။ သူများဟာကို အဲ့ဒီလို မလုပ်ရဘူးလေ”
ဟူ၍ ပြောလိုက်လေရာ ငထွန်းဆိုသူ လူထွားလေးမှ …
“ကျုပ်ဟာကျုပ် တောင်းစားချင်လို့ တောင်းစားတာ ခင်ဗျား အရေးလား၊ ဒီမှာ ဒေါ်အေးမေကြီး ခင်ဗျား သာကူ တစ်အိုးလုံး ဝယ်စားလိုက်လို့ ရတယ်ဗျ။ နားလည်လား”
ဟူ၍ ပြန်လည် ပြောဆိုလေရာ ဒေါ်အေးမေကြီးလည်း ငြိမ်နေရတော့၏။ အဘယ်ကြောင့် ဆိုသော် ငထွန်း၏ မိဘဖြစ်သူများမှာ အဆိုပါ ရွာလေးအတွင်းမှ မျက်နှာကြီးများ ဖြစ်ကြသကဲ့သို့ အလွန်မာန်မာနကြီးပြီး ရက်စက်တတ်သူများလည်း ဖြစ်ကြသောကြောင့် ဖြစ်လေ၏။

ကတုံးလေးမှာမူ သာကူပန်းကန်အား ရင့်သီးစွာ လုယူသွားသည့် လူထွားလေးအား မျက်နှာငယ်လေးဖြင့်သာ ကြည့်နေရရှာလေ၏။ ယင်းအခြေအနေအား လွန်စွာ သဘောကျသော မျက်နှာထားဖြင့် လူထွားလေး သည် ကတုံးလေး ထံမှ နိုင်ထက်ကလူ တောင်းယူထားသည့် သာကူပန်းကန်အား သောက်လိုက်လေ၏။ သို့ရာတွင်မူ လူထွားလေး၏ ပါးစပ်အတွင်းသို့ သာကူ မရောက်ခင်မှာပင် ၎င်း၏ ဦးခေါင်းထက်ဆီမှ အသံတစ်သံသည် ထွက်ပေါ်လာလေတော့၏။ ထိုအသံမှာကား “ဖြောင်း …” ဟူသော အသံပင် ဖြစ်ချေတော့၏။

ဗိုလ်ကျသည့် လူထွား ငထွန်း၏ ခေါင်းအား ဆံရှည်လေးမှ နောက်မှနေ၍ လက်ဖြင့် တအားလွှဲကာ ရိုက်ချလိုက်ခြင်း ဖြစ်လေသည်။ ယင်းရိုက်ချက်ကြောင့် လူထွားငထွန်း၏ လက်အတွင်းမှ သာကူပန်းကန်မှာ မျက်နှာနှင့် မိတ်ဆက်မိသား ဖြစ်သွားလေတော့၏။ သာကူများမှာလည်း အတန်ပူလောင်နေသောကြောင့် လူထွားငထွန်းလည်း ၎င်း၏ မျက်နှာအား လက်ဖြင့် အုပ်ကာ “အမေရေ၊ ပူတယ်ဗျ .. ပူတယ်” ဟူ၍ အော်မြည်လေတော့၏။ ယင်းနောက် လူထွားငထွန်းသည် ရွာဆီသို့ ထွက်ပြေးသွားလေတော့၏။

ကတုံးလေးမှာ မိမိအပေါ် ဗိုလ်ကျသည် လူထွားငထွန်း၏ ခံလိုက်ရပုံများအား မျက်ဝါးထင်ထင် တွေ့မြင်လိုက်ရသဖြင့် ဝမ်းသာနေမိလေ၏။ ငထွန်းအား သမ လိုက်သည့် ဆံရှည်လေးအားလည်း လူစွမ်းကောင်းသဖွယ် အထင်ကြီးသော အကြည့်ဖြင့် ကြည့်နေမိလေ၏။

ယင်းနောက် ဆံရှည်လေးမှာ သာကူဖိုး နှစ်ကျပ်ကို ဒေါ်အေးမေကြီးအား ပေးလိုက်ပြီးနောက် ကတုံးလေးအား ခေါ်ဆောင်ကာ ကျောင်းဆီသို့ ထွက်သွားလေတော့၏။ သာကူသည် ဒေါ်အေးမေကြီးမှာမူ မြေကြီးပေါ် လွှင့်ကျသွားသည့် သာကူပန်းကန်အား ကောက်ယူ ဆေးကြောခြင်း၊ မြေကြီးပေါ် ပေကျံနေသည့် သာကူများအား လှဲကျင်းခြင်းတို့ဖြင့် စိန်ပန်းပင်ကြီးအောက်တွင် ကျန်နေရစ်ခဲ့လေတော့၏။
+ + + + + + + + + + + + + + +
မိမိ သူငယ်ချင်းဖြစ်သူ ကတုံးလေးအပေါ်တွင် ဗိုလ်ကျ အနိုင်ကျင့်သည့် လူထွားငထွန်းအား ရိုက်နှက်လိုက်သော ဆံရှည်လေးမှာ ရွာအနောက်ပိုင်းမှ ပဲပြုတ်ရောင်းသည့် ဒေါ်နွေးနွေး၏ တူသား တော်စပ်သူ ဖြစ်လေသည်။ ဆံရှည်လေး၏ မိဘများမှာ ကွယ်လွန်သွားကြပြီ ဖြစ်သည့်အတွက်ကြောင့် ဒေါ်နွေးနွေးမှ နေ၍ ဆံရှည်လေးအား ၎င်း၏ အိမ်တွင် ခေါ်ယူကျွေးမွေးထားခြင်း ဖြစ်လေသည်။

ဒေါ်နွေးနွေး၏ ယောက်ကျားဖြစ်သူမှာ ဦးကျော်ကြီး ဆိုသူ ဖြစ်လေသည်။ ဦးကျော်ကြီးသည် သူတစ်ပါး လယ်ယာများအား အငှားအလုပ်သမား အဖြစ် လိုက်လံလုပ်ကိုင်နေသူ ဖြစ်လေသည်။ ဆံရှည်လေးအား ချစ်ခင်သူလည်း ဖြစ်ပေသည်။ ယင်းအတွက်ကြောင့်ပင် ဆံရှည်လေး၏ အဒေါ်အရင်းဖြစ်သူ ၎င်း၏ ဇနီးမယား ဒေါ်နွေးနွေး၏ အတန်တန် ကန့်ကွက်သည့် ကြားမှပင် ဆံရှည်လေးအား ခေါ်ယူ ကျွေးမွေးထားသကဲ့သို့ အတန်းကျောင်းသို့လည်း တက်ရောက်စေခဲ့လေသည်။ ယင်းကုန်ကျစရိတ်များအား ဦးကျော်ကြီးမှ တာဝန်ယူကာ ပေးထားရခြင်း ဖြစ်လေသည်။ ဒေါ်နွေးနွေးများမှာ တူသား အရင်းခေါက်ခေါက် ဆံရှည်လေး အပေါ်တွင် မသတီသကဲ့သို့ လွန်စွာမှလည်း ခိုင်းစေတတ်လေ၏။

ဆံရှည်လေးမှာမူ ၎င်း၏ အဒေါ်မှ မညှာမတာ ခိုင်းစေသော်လည်း မညည်းမညူ ပြုလုပ်ပေးတတ်လေ၏။ ၎င်းအား ခေါ်ယူကျွေးမွေးကာ ကျောင်းထားပေးထားသည့် ဦးကျော်ကြီး အပေါ်တွင်လည်း လွန်စွာမှ ချစ်ခင်လေ၏။ ၎င်းအားလပ်သည့် အခါများတွင် ဦးကျော်ကြီးနှင့်အတူ ယာခင်းအတွင်း ကူ၍လုပ်ပေးတတ်လေ၏။

ကတုံးလေးနှင့် ဆံရှည်လေးတို့မှာ အိမ်ဝိုင်း တစ်ဝိုင်းထဲတွင် နေထိုင်ကြခြင်း ဖြစ်လေသည်။ ကတုံးလေး၏ မိဘများမှာ ထန်းသမားများ ဖြစ်ကြလေ၏။ သို့ရာတွင် ကိုယ်ပိုင် ထန်းပင်များအား တက်ရောက်ရသည် မဟုတ်ဘဲ၊ သူများထန်းပင်များအား အငှားအနေဖြင့် တက်ရောက်ကာ ထန်းလျက်ကျိုချက်ပေးရခြင်း ဖြစ်လေသည်။ ကတုံးလေးတို့ မိသားစု အငှားတက်ရောက် ပေးရသော ထန်းပင်များမှာ လူထွားငထွန်း၏ မိဘများ ပိုင်ဆိုင်သော ထန်းပင်များသာ ဖြစ်လေသည်။

ထိုကတုံးလေး၏ အမည်ရင်းမှာ မောင်ပု ဖြစ်သော်လည်း အမြဲတစေ ကတုံးဖြင့်သာ ရှိနေတတ်သောကြောင့် ကတုံးဟူ၍ အမည်တွင်နေခြင်း ဖြစ်လေ၏။ ကတုံး မောင်ပု၏ သူငယ်ချင်း ဖြစ်သူ ဆံရှည်လေး၏ အမည်မှာကား မောင်ဗျာသ ဟူ၍ ဖြစ်လေတော့၏။

++++++++++++++++++++++++

By - မဟာရာဇာ အံစာတုံး

++++++++++++++++++++++++
1:50 AM

ကမ္ဘာ့ အန္တရာယ်အများဆုံး တိရစ္ဆာန် (၁၀) မျိုး

Posted by Sayar Ann

၁။ ခြင် (Mosquito)


ရိုးရိုး အမြင်အားဖြင့် ကြည့်မယ်ဆိုရင် ” ခြင် ဆိုတဲ့ အကောင်တွေက ဘာအန္တရာယ် ရှိလို့လဲ ..? ” ဆိုပြီး မေးခွန်း ထုတ်နိုင်ပါတယ်။ ဟုတ်ကဲ့ …။ ခြင်တွေက အရွယ်အစားအားဖြင့် လူတစ်ယောက်ရဲ့ လက်သည်းခွံလောက်တောင် မရှိပါဘူး။ လာကိုက်သလား …၊ ဖြတ်ခနဲ ရိုက်သတ်လိုက်ရုံပါပဲ။ ဒါပေမယ့် ခြင်ဆိုတဲ့ အကောင်တွေက တကယ့်ရောဂါပိုးတွေကို သယ်ဆောင် ထားကြပါတယ်။ ဒါကြောင့်ပဲ ကမ္ဘာ့ လူသတ်သမား အကြီးစားတွေ လို့တောင်မှ သတ်မှတ်ထားကြပါသေးတယ်။

ခြင်တွေ သယ်ဆောင်ထားတဲ့ ရောဂါပိုးတွေကတော့ အများသိကြတဲ့ အတိုင်း ငှက်ဖျား၊ ဆင်ခြေထောက်၊ West Nile Virus ဆိုတဲ့ ရောဂါပိုးတွေပါပဲ။ ဒီထဲမှာ အန္တရာယ် အကြီးဆုံးကတော့ ငှက်ဖျား ရောဂါပိုးပါပဲ။ ဒီရောဂါ ကူးစက်ခံနေရသူ အရေအတွက်ဟာ ကမ္ဘာ့လူဦးရေရဲ့ တစ်ဝက်ခန့် ရှိတယ်လို့ WHO မှာ ဖော်ပြထားပါတယ်။

ခြင်တွေကြောင့် သေဆုံးမှုနှုန်းဟာ တစ်နှစ်ကို ၂ သိန်းမှ ၃ သိန်းကြား ရှိတယ်လို့ သိရပါတယ်။

++++++++++++++++++++++++++++++++++


၂။ အဆိပ်ပြင်းသော မြွေများ (Venomous Snakes)


မြွေတွေကို ဒီစာရင်းထဲ ထည့်တာတော့ မလွန်လောက်ပါဘူး။ မြွေကိုက်လို့ အသက် အန္တရာယ် ဆုံးရှုံးသွားခဲ့ရသူတွေ ကျွန်တော်တို့ မြန်မာပြည်မှာ အများကြီးပါ။ ဒီထဲမှာ တောဘက်က ဆေးရုံ၊ ဆေးခန်းနဲ့ မနီးစပ်တဲ့ လူတွေ ပိုပြီး ခံစားရပါတယ်။ အချို့ဆို ဘာမြွေကိုက်လို့ ကိုက်သွားမှန်း မသိလို့ ဆေးမှား ထိုးမိပြီး အသက် ဆုံးရှုံးခဲ့ရတာတွေလည်း အများကြီးပါပဲ။ ထားပါ။ အဆိပ်ပြင်းတဲ့ မြွေမျိုးစိတ်ပေါင်းဟာ ၄၅၀ ကျော် ရှိတယ်လို့ ဆိုပါတယ်။ မြွေကိုက်လိုက်ပြီ ဆိုတာနဲ့ မြွေဆိပ်ဟာ သွေးကြောကနေတစ်ဆင့် ခန္ဓာကိုယ် တစ်ခုလုံးကို ပျံ့နှံ့သွားစေပါတယ်။ အဆိပ်ပြင်းလေ ဆေး မမှီလေပေါ့ဗျာ။

အဆိပ်ပြင်း မြွေဆိုးတွေကြောင့် သေဆုံးမှုနှုန်းဟာ တစ်နှစ်ကို ၅၀ ကနေ ၁၂၅၀၀၀ ကြားမှာ ရှိတယ်လို့လည်း ဆိုပါတယ်။

++++++++++++++++++++++++++++++++++


၃။ ကင်းမြီးကောက် (Scorpion)


ကင်းမြီးကောက် ကိုက်လို့ သေတယ် ဆိုတဲ့ စကားကိုတော့ ကျွန်တော်တို့ဆီမှာ ကြားဖူးနားဝ အတော်လေး နည်းမှာပါ။ ဒါပေမယ့် ဒီကောင်တွေဟာလည်း အန္တရာယ် ကြီးမားတဲ့ တိရစ္ဆာန်တွေပါတဲ့။ တစ်နှစ်ကို ကင်းမြီးကောက်ကြောင့် သေဆုံးမှုနှုန်းဟာ ၈၀၀ ကနေ ၂၀၀၀ ကြားမှာ ရှိတယ်လို့လည်း ဆိုပါတယ်။

++++++++++++++++++++++++++++++++++


၎။ ကြောင်ကြီးများ (Big Cats)


ကြောင်ကြီးများဆိုလို့ ကျွန်တော်တို့ အိမ်မွေး တိရစ္ဆာန် ကြောင် အကြီးစားတွေကို ပြောတာ မဟုတ်ပါဘူး။ ခြင်္သေ့၊ ကျား၊ ကျားသစ် စတဲ့ တိရစ္ဆာန်တွေကို ဆိုလိုတာပါ။ ဒီကောင်တွေရဲ့ အန္တရာယ် များပုံကတော့ ပြောစရာ မလိုလောက်ပါဘူး။ သူတို့ကတော့ ခွန်အားနဲ့ အန္တရာယ် ပြုတတ်တဲ့ တိရစ္ဆာန်တွေပါပဲ။ ဒီကြောင်ကြီးမျိုးနွယ်တွေကြောင့် တစ်နှစ်ကို သေဆုံးမှုနှုန်းဟာ ၈၀၀ ဝန်းကျင်ခန့် ရှိတယ်လို့ ဆိုပါတယ်။


++++++++++++++++++++++++++++++++++


၅။ မိကျောင်း (Crocodile)


မိကျောင်းတွေဟာ ကမ္ဘာ့ အန္တရာယ် အများဆုံး တိရစ္ဆာန်တွေထဲက တစ်ကောင်ဆိုရင် အားလုံးပဲ လက်သင့် ခံနိုင်ကြမယ် ထင်ပါတယ်။ ခြွင်းချက်အားဖြင့် ဆိုရင်တော့ မိကျောင်းကို ထူးထူးခြားခြား အိမ်မွေး တိရစ္ဆာန်အဖြစ် မွေးတဲ့လူတွေတော့ ရှိနေပါတယ်။ ထားပါ။ မိကျောင်းတွေ ထဲမှာဆိုရင် အာဖရိကနဲ့ သြစတြေးလျ က မိကျောင်းတွေက ပိုပြီး အန္တရာယ် များတယ်လို့လည်း ဆိုထားပါတယ်။ ရေထဲမှာဆိုရင် ရေဘုရင်လို့ ဆိုရလောက်အောင်ပဲ သူတို့ရဲ့ ရွှေ့လျားမှုနှုန်းဟာ မြန်ဆန်လှပါတယ်။ ပြီးတော့ သူတို့ရဲ့ မေးရိုးကလည်း ဖမ်းမိထားတဲ့ သားကောင်ကို ရုန်းထွက်နိုင်စွမ်း မရှိလောက်အောင် ခိုင်မာလွန်လှတယ်လို့ ဆိုပါတယ်။

မိကျောင်းတွေကြောင့် သေဆုံးမှုနှုန်းကတော့ တစ်နှစ်ကို ၆၀၀ မှ ၈၀၀ ကြားမှာ ရှိတယ်လို့ သိရပါတယ်။


++++++++++++++++++++++++++++++++++


၆။ ဆင် (Elephant)


ဆင်တွေကိုလည်း ဒီစာရင်းထဲမှာ နံပါတ် ၆ နေရာက သွပ်သွင်းထားပါတယ်။ သူတို့ရဲ့ ကြီးမားတဲ့ ခန္ဓာကိုယ်နဲ့ အင်အား၊ ပြီးတော့ အစွယ်တွေက လူတွေကို အသာလေး ဒုက္ခပေးနိုင်ပါတယ်။ ကြာနီကန် ဆရာတော်ရဲ့ တရားတစ်ပုဒ်ထဲမှာတော့ ဆင်ဝင်စား လူတစ်ယောက် ပြောပြသွားပုံလေးကို ဟောထားပါတယ်။ အဲ့ဒီထဲမှာ ပြောသွားတာက လူ့ဘုန်းကံ ပေါ့ဗျာ။ လူ့ဘုန်းကံ မြင့်နေချိန်မှာဆိုရင် ဆင်တွေရဲ့ အမြင်မှာ လူဟာ သူတို့ထက် ကြီးမားတဲ့ လူကြီးတစ်ယောက်လို့ မြင်နေရပြီး ကြောက်ရွှံ့ကြပါတယ်။ လူ့ဘုန်းကံ နိမ့်နေချိန်မှာတော့ ဆင်တွေရဲ့ အမြင်မှာ လူဟာ သူတို့ရဲ့ ခြေဖဝါးအရွယ်လောက်ပဲ ရှိတယ်လို့ မြင်ကြောင်းကို ပြောပါတယ်။ လူ့ဘုန်းကံ နိမ့်နေချိန်မှာ ဆင်တွေက လူကို မလုပ်ချင်တာနေမယ်။ လုပ်ရင် အသေပဲလို့လည်း ဆိုထားပါသေးတယ်။ ဒါကတော့ ဆင် အကြောင်း စပ်မိတုန်းပေါ့ ခင်ဗျာ။

ဆင်တွေကြောင့် သေဆုံးမှု နှုန်းကတော့ဖြင့် တစ်နှစ်ကို ၃၀၀ ကနေ ၅၀၀ ကြား ရှိတယ်လို့ ဆိုထားပါတယ်။

++++++++++++++++++++++++++++++++++

၇။ ရေကြံ့၊ ရေမြင်း (Hippopotamus)


ဒီအကောင်တွေကတော့ အာဖရိကမှာ အတွေ့ရများတယ်လို့ ဆိုပါတယ်။ ညှာတာ စာနာမှု အကင်းမဲ့ဆုံး တိရစ္ဆာန်တွေလို့လည်း ဆိုထားပါသေးတယ်။ သူတို့ဟာ ရေထဲမှာရော၊ ကုန်းပေါ်မှာပါ ရှင်သန် နေထိုင်လေ့ ရှိကြပါတယ်။ ဒီအကောင်ကြီးတွေရဲ့ပါးစပ်တွေဟာ လေးပေအထိ ဖွင့်ဟနိုင်ပြီး တူမကြီးနဲ့ ရိုက်ချလိုက်သလို ကြမ်းကြမ်းတမ်းတမ်း ပိတ်ဆို့ ဖမ်းယူ နိုင်ပါသေးတယ်။ ဒီလို အကျင့်စရိုက်ကြောင့်ပဲ သူတို့ကို ကမ္ဘာ့ အန္တရာယ်များတဲ့ တိရစ္ဆာန် စာရင်းထဲမှာ ထည့်သွင်းလိုက်ရခြင်း ဖြစ်တယ်လို့ ဆိုပါတယ်။

ရေကြံ့၊ ရေမြင်းတွေကြောင့် သေဆုံးမှု နှုန်းကတော့ တစ်နှစ်ကို ၁၀၀ ကနေ ၁၅၀ ကြားမှာ ရှိတယ်လို့လည်း ဆိုပါတယ်။

++++++++++++++++++++++++++++++++++

၈။ ဂျယ်လီငါး (Jellyfish)


ဒီဂျယ်လီငါးတွေရဲ့ အသွင်ကတော့ စိတ်ဝင်စားဖွယ် ကောင်းလှပါတယ်။ ဒါပေမယ့် ထိတ်လန့် တုန်လှုပ်ဖွယ်လည်း ကောင်းလှပါတယ်လို့ ဆိုထားပါတယ်။ သူတို့ အန္တရာယ်များတဲ့ အကြောင်းကိုတော့ သိပ်ပြီး မသိပါဘူး။ သိတဲ့လူတွေ ရှိရင် ပြောပေးစေလိုပါတယ်။ ဘာပဲဖြစ်ဖြစ် ဂျယ်လီငါးတွေကြောင့် သေဆုံးမှုနှုန်းကတော့ တစ်နှစ်ကို ၁၀၀ ဝန်းကျင်ခန့် ရှိတယ်လို့ ဆိုထားပါတယ်။ Jellyfish-Wikipedia

++++++++++++++++++++++++++++++++++

၉။ ငါးမန်း (Shark)


ငါးမန်းလို့ ဆိုလိုက်ရင် ကျွန်တော်တို့ တစ်တွေဟာ ချွန်မြလှတဲ့ သွားတွေနဲ့ ရေပြင်ထဲက ကြောက်မက်ဖွယ် တိရစ္ဆာန် တစ်ကောင်လို့ မြင်မိကြမှာပါ။ ငါးမန်း ရုပ်ရှင်တွေ ကြည့်ဖူးတဲ့သူတိုင်း ငါးမန်းကို ရွှံရှာ ကြောက်ရွှံ့ကြသလို၊ ပင်လယ်ပြင်ကို ဖြတ်တဲ့ အခါမျိုးမှာလည်း သွေး ရေသို့ မကျစေဖို့ သတိထားမိလိမ့်မယ် ထင်ပါတယ်။ သို့ပေမယ့် ကျနော်တို့ ရုပ်ရှင်ထဲမှာ တွေ့ရတဲ့ ငါးမန်းတွေလောက် အပြင်က တကယ့်လက်ရှိ ငါးမန်းတွေက မဆိုးဝါးလှဘူးလို့ ဆိုပါတယ်။ ဒါပေမယ့်လို့လည်း သူတို့ဟာ ရက်စက် ဆိုးဝါးလှတဲ့ လူသတ် တိရစ္ဆာန်တွေပဲ ဖြစ်ကြပါတယ်။

ငါးမန်းတွေကြောင့် တစ်နှစ်ကို သေဆုံးမှုန်နှုန်းဟာ ၁၀၀ ဝန်းကျင်ခန့် ရှိတယ်လို့ သိရပါတယ်။

++++++++++++++++++++++++++++++++++

၁၀။ ဝက်ဝံ (Bear)


ဝက်ဝံ တွေဟာ လူသားတွေရဲ့ အချစ်ခင်ဆုံး သူငယ်ချင်း တစ်ယောက်အဖြစ် မိတ်ဖွဲ့လို့ ရနိုင်သလို၊ သူတို့ကို ပွေ့ဖက် ပွတ်သပ်ပြီး ရင်းရင်းနှီးနှီး ကစားနေလို့လည်း ရနိုင်ပါတယ်။ ဒါဖြင့် သူတို့ကို အန္တရာယ် များတဲ့ တိရစ္ဆာန် စာရင်းထဲ ထည့်ထားရတာလဲ ??? ဟုတ်ကဲ့။ တောနက် ထဲမှာ ဝက်ဝံ တစ်ကောင်နဲ့ ရင်ဆိုင် တွေ့ရတဲ့အခါ မျိုးမှာ သင် သိလာပါလိမ့်မယ်။ ဆိုလိုချင်တာကတော့ တောရိုင်း တိရစ္ဆာန် ဖြစ်တဲ့ ဝက်ဝံ မျိုးကို ဆိုလိုတာပေါ့ဗျာ။ ဟုတ်ပါတယ်။ တောထဲမှာ ဝက်ဝံ တစ်ကောင်နဲ့ ရင်ဆိုင် တွေ့ပြီဆိုရင် အသက်ပါ ပါသွားနိုင်လောက်အောင် အန္တရာယ် များလှပါတယ်။ ဒါကြောင့်ပဲ ဒီစာရင်းထဲ ထည့်ရခြင်း ဖြစ်ပါတယ်။ ဝက်ဝံတွေကြောင့် သေဆုံးမှု နှုန်းကတော့ တစ်နှစ်ကို ၅ ယောက်ကနေ ၁၀ ယောက်ကြား ဖြစ်ပါတယ်။

++++++++++++++++++++++++++++++++++

မှီငြမ်း - http://scienceray.com

By - မဟာရာဇာ အံစာတုံး
================
2:03 AM

သရဲကို ထိကိုင်မိခြင်း

Posted by Sayar Ann
ကျနော်တို့ ရွာမှာပေါ့ …။ ဦးထွန်းမြင့် ဆိုတဲ့ လူကြီး တစ်ယောက်ရှိတယ်။ ရွာရဲ့ ညနေခင်း အချိန်တိုင်းမှာ ဦးထွန်းမြင့်တို့ အိမ်ကို လာနေကျ လူတစ်ယောက်လည်း ရှိတယ်။ သူက ဦးနီ …။ ညနေဆိုရင် ဦးနီ က ဦးထွန်းမြင့်ရဲ့ အိမ်ကိုလာပြီး ရေနွေးသောက်ရင်း စကား စမြည် ပြောလေ့ ရှိပါတယ်။

ဦးနီ တစ်ယောက် နေထိုင် မကောင်းဖြစ်တဲ့ အချိန်မှာ ဦးထွန်းမြင့် တစ်ယောက်တည်း ဖြစ်နေပါတယ်။ အင်း .. မောင်နီ တစ်ယောက် နေမကောင်းလို့ များလား မသိပါဘူး … ဆိုပြီး ဦးထွန်းမြင့် မျှော်နေမိတာပေါ့။ အဲလို ဦးနီ နေမကောင်း ဖြစ်ပြီး တစ်ပတ် ကျော်ကျော်လောက် အကြာ တစ်ခုသော ညနေမှာပေါ့ …။ ဦးထွန်းမြင့် တစ်ယောက် အိမ်ရှေ့ ကွပ်ပစ်မှာ ရေနွေးကြမ်း ထိုင်သောက်နေတယ်။ ဒါနဲ့ ဦးထွန်းမြင့်က မျက်စိ အမြင် သိပ်မကောင်းပါဘူး။



ခပ်မှိုင်းမှိုင်း အချိန် (ညီအစ်ကို မသဲမကွဲ အချိန်) လောက်လည်း ရောက်ရော ဦးထွန်းမြင့် ရေနွေးကြမ်း ထိုင်သောက်နေရာက ဆီးသွားချင်လာတဲ့ အတွက် ကွပ်ပစ် ပေါ်က ဆင်းဖို့ လုပ်လိုက်တယ်။ အဲဒီ အချိန်မှာပဲ ဗုန်းဆို ဦးနီက သူ့ဘေးနား ရောက်ချ လာရော။ ဦးထွန်းမြင့်က မျက်စိ သိပ်မကောင်းတော့ ဦးနီမှန်း မသိဘူး။ အိမ်တိုင်ပဲ မှတ်ပြီး အဲဒီ အိမ်တိုင်ကို အားယူထဖို့ လှမ်းကိုင် လိုက်တယ်။ လှမ်းလည်း ကိုင်လိုက်ရော ရေခဲတုံး ကို ကိုင်လိုက်ရသလိုမျိုးလို့ပဲ ဆိုပါတော့ …။ အေးစက်စက် အသားစိုင် တစ်ခုကို ကိုင်လိုက်ရလို ဖြစ်သွားတော့ ဦးထွန်းမြင့် နည်းနည်း တွန့်သွားပါတယ်။ စိတ်ထဲလည်း ဇဝေဇဝါ ဖြစ်သွားတာပေါ့ …။

ဦးထွန်းမြင့် တစ်ယောက် ဆီးသွားပြီး ကွပ်ပစ်ဆီ ပြန်လာထိုင်တဲ့ အချိန်မှာ ကောင်လေးတစ်ယောက် ရောက်လာပြီး ဦးထွန်းမြင့်ကို လာပြောတယ်။ “ထွေးလေးထွန်း … ဦးနီကြီး စောစောက ဆုံးသွားပြီတဲ့” … ။ အဲဒီ အချိန်မှာတော့ ဦးထွန်းမြင့် ဆပ်စပ် တွေးမိသွားပြီး အင်း … မောင်နီ ငါ့ဆီ လာသွားတာပါလား .. လို့ သိသွားပါတော့တယ် … ။

အထက်ပါ အဖြစ်အပျက်လေးကတော့ သရဲ၊ တစ္ဆေကို ကိုင်မိခဲ့တဲ့ ကျနော်တို့ ရွာက လူကြီး တစ်ယောက်ရဲ့ အဖြစ်သနစ်လေးပါပဲ။ သရဲက ကိုယ်ထင်ပြပြီး ညကြီး သန်းခေါင် ကုတင်ခြေရင်းမှာ မတ်တပ် လာရပ်ပြတဲ့ အဖြစ်တွေကတော့ အများကြီး ရှိနိုင်ပါတယ်။ ခုလို အမှတ်မထင် သရဲကို ထိတွေ့ကိုင်တွယ် ဖူးတဲ့ အဖြစ်ကတော့ ရှားပါတယ်။ ဒါကြောင့် ဒီနေရာက ရွာသူားတွေကို ဗဟုသုတ အလို့ငှာ တင်ပြလိုက်ရခြင်း ဖြစ်ပါတော့တယ်။


By - မဟာရာဇာ အံစာတုံး
================
10:59 PM

တောင်ပေါ်က တယောသံ

Posted by Sayar Ann

ထိုတောင်

ထိုတောင်သည် အမြင့်အားဖြင့် မနိမ့်လွန်း၊ မမြင့်လွန်းပေ။ ထိုတောင်ပေါ်၌ ထုံးဖြူဖြူ စေတီတစ်ဆူလည်း တည်ထားလေ၏။ သို့ရာတွင် ထိုတောင်ပေါ်သို့ တက်ရောက်၍ ဘုရား ဖူးမြော်သူမှာ နည်းပါး၏။ အဘယ်ကြောင့် ဆိုသော် ထိုတောင် ပတ်လည်တွင် ချုံပုတ်များ၊ ဆူးရှိသည့် အပင်များ များစွာ ပေါက်ရောက်နေသည့် အပြင် လူသွားလမ်း ဟူ၍ ကောင်းစွာ မရှိသောကြောင့်လည်း ဖြစ်ပေသည်။

ထိုတောင်၏ မြောက်အရပ် နှစ်မိုင်ခန့် အကွာတွင်မူ ရွာငယ်တစ်ရွာ ရှိလေသည်။ ထိုရွာငယ်၏ အမည်မှာ ရွက်လှရွာ ဟူ၍ တွင်လေ၏။ ထိုရွာမှ ရွာသူရွာသားများမှ ထိုတောင်အား ရန်အောင်တောင် ဟူ၍ ခေါ်တွင်ကြလေ၏။ ယင်းအမည်တွင်ရခြင်း အကြောင်းမှာလည်း ယခင်က ထိုတောင်ပတ်လည်တွင် တည်ရှိသော မြေပဲ၊ နှမ်းများ စိုက်ပျိုးသည့် ယာခင်းများမှာ ဦးရန်အောင် ဟူသော လူကြီးတစ်ဦးမှ ပိုင်ဆိုင်လေသောကြောင့် ထိုတောင်ကိုလည်း ဦးရန်အောင် တောင်ဟူ၍ နောက်ပြောင် ခေါ်ဝေါ်သည်မှစ၍ ရန်အောင်တောင် ဟူသောအမည်မှာ တွင်ခဲ့ခြင်းသာ ဖြစ်လေသည်။

ထိုတောင်ပေါ်တွင် တည်ထားသော ထုံးဖြူဖြူ စေတီလေးကိုလည်း တောင်၏ အမည်ကို အစွဲပြု၍ပင် ရန်အောင်စေတီ ဟူ၍ ခေါ်တွင်လေ၏။ ထိုစေတီလေးအား မည်သည့်အချိန်၊ မည်သည့်အခါ၌ မည်သူ တည်ထားခဲ့သည်ကို မည်သူမှ အတိအကျ မသိကြပေ။ ထိုစေတီနှင့် ထိုတောင်တွင် အစောင့်အရှောက်များ၊ ဥစ္စာစောင့်များ ရှိသည်ဟူ၍လည်း ထိုပတ်ဝန်းကျင်ရှိ ရွာများတွင် သတင်းကြီးလေ၏။ ယင်းအချက်သည်လည်း ထိုတောင်ပေါ်သို့ အသွားအရောက် နည်းခြင်း အကြောင်းအချက် တစ်ခု ဖြစ်၍ နေပေတော့၏။



ရန်အောင်တောင်နှင့် မလှမ်းမကမ်း အရပ်တွင် ဦးသာအောင် ဟူသော အဖိုးကြီးတစ်ဦး ပိုင်ဆိုင်သည့် ယာတစ်ကွက် ရှိလေ၏။ ထိုအဖိုးကြီးသည် ၎င်း၏ ယာကွက်အတွင်း ၎င်းနေထိုင်ရန်အတွက် တဲငယ်တစ်လုံး ဆောက်လုပ်ထားလေ၏။ အဖိုးကြီး ဦးသာအောင်မှာ ရွက်လှ ရွာသားတစ်ဦး ဖြစ်ပြီး ၎င်းမှ ရွာအတွင်း ဆူညံလှသည်ဟူသော အကြောင်းပြချက်ဖြင့် ၎င်းပိုင်ဆိုင်သော ယာကွက်အတွင်း ယင်းကဲ့သို့ တဲငယ်တစ်လုံး တည်ဆောက်၍ နားအေးပါးအေး ဆိုသကဲ့သို့ပင် တစ်ယောက်တည်း နေထိုင်လေ့ ရှိလေသည်။

အဖိုးကြီး ဦးသာအောင်မှာ ညခင်း မှောင်ရည်စပျိုးချိန်တွင် ရွာမှ ၎င်း၏ မြေးဖြစ်သူ မောင်အောင်ဦး လာရောက်ပို့ပေးသည့် ထမင်းအား မြိန်ယှက်စွာ စားသောက်လေ့ ရှိ၏။ ပြီးနောက်တွင် ခံတွင်းချဉ်ခြင်းအား ဖြေဖျောက်ရန် အလို့ငှာ ပြောင်းဖူး ဆေးလိပ်ကြီးအား မီးတရဲရဲဖြင့် ဖွာရှိုက်လေ့ ရှိပြန်၏။ ယင်းနောက်တွင် မူကား အဖိုးကြီး ဦးသာအောင်မှာ အိမ်ယာ ဝင်လေ့ ရှိလေသည်။

ဦးသာအောင်မှာ ည သန်းခေါင်ယံ အခါတွင် တစ်ရေးနိုးလေ့ ရှိ၏။ ထိုအခါ အပေါ့အပါး သွား၍ ၎င်း၏ တဲအရှေ့ရှိ ကွပ်ပျစ်ပေါ်တွင် ထိုင်ကာ ဓာတ်ဗူးအတွင်း အဆင်သင့် ထည့်ထားသော ရေနွေးကြမ်းအား ဇိမ်ခံ၍ သောက်နေတတ်လေသည်။ ဤနေရာတွင် ဖြည့်စွက်၍ ပြောရပါလျှင် ဦးသာအောင်မှာ ကြောက်တတ်သူတစ်ယောက် မဟုတ်ပေ။ ဥစ္စာစောင့်များ ရှိသည်ဟူ၍ နာမည်ကြီးသော တောင်အနီးတွင် တစ်ယောက်တည်း ညအိပ်ညနေ နေထိုင်သည်ကို ကြည့်ခြင်း အားဖြင့်ပင် ဦးသာအောင်မှာ တော်ရုံ ကြောက်တတ်သူ စာရင်းတွင် မပါဝင်ကြောင်းကို စာဖတ်သူတို့ သတိပြုမိပေလိမ့်မည်။

++++++++++++++++++++++

သူတို့ မြေးအဖိုး

အဖိုးကြီး ဦးသာအောင်၏ မြေးဖြစ်သူ မောင်အောင်ဦးသည် နေ့စဉ် ညနေချိန်တိုင်းတွင် ဦးသာအောင်အတွက် ထမင်း လာရောက်၍ ပို့လေ့ ရှိလေသည်။ တစ်ခုသော နေ့တွင်မူ မောင်အောင်ဦးသည် ရွာသို့ မပြန်တော့ ဟူ၍ ပြောကာ ဦးသာအောင်နှင့်အတူပင် အဆိုပါ တဲကလေး၌ အိပ်စက်ခဲ့လေသည်။ အဖိုးကြီး ဦးသာအောင်မှာ ၎င်း၏ ထုံးစံအတိုင်း ဆိုသကဲ့သို့ပင် သန်းခေါင်းယံ အချိန်၌ နိုးလာခဲ့၍ တဲကလေး အရှေ့ရှိ ကွပ်ပျစ်ပေါ်တွင် အေးအေးလူလူ တစ်ယောက်တည်း ထိုင်ရင်း ရေနွေးကြမ်း သောက်နေလေသည်။

မောင်အောင်ဦးသည် ဦးသာအောင် နိုပြီး အတန်ငယ် ကြာသောအခါ ၎င်းသည်လည်း တစ်ရေးနိုး နိုးထလာခဲ့လေ၏။ မောင်အောင်ဦးသည် နိုးထကာစတွင် တဲအရှေ့ ကွပ်ပျစ်ပေါ်၌ ထိုင်လျက် ရှိသော ၎င်း၏ အဖိုးဖြစ်သူအား သရဲ ဟူသော အမှတ်ဖြင့် ကြောက်ရွံ့နေသေး၏။ သို့ရာတွင်မူ ၎င်း၏ အဖိုးမှန်း သိသွားသောအခါတွင် အိပ်ယာမှ ထ၍ အဖိုးဖြစ်သူထံ သွားရောက်၍ ထိုင်နေလေ၏။

“ဘယ်လိုတုန်း ငါ့မြေးရဲ့၊ တစ်ရေးနိုးလာတာလားကွ”

“ဟုတ်တယ် အဘ၊ ဒါနဲ့ အဘကလည်း ညကြီးမင်းကြီး တစ်ယောက်တည်း ဘာလို့ ထိုင်နေတာတုန်း၊ ခုဟာက ရွာထဲလည်း မဟုတ်ဘူး၊ တောထဲ အဘရဲ့”
“ဟ … ငါ့မြေးကလည်း၊ တောထဲနေနေ ရွာထဲနေနေ ညဟာ ညပါပဲကွ၊ တောထဲက ရွာထဲထက် ပိုပြီးတောင် လေကောင်းလေသန့် ရပါသေးတယ်ကွာ”
“အဘ ကလည်းဗျာ၊ ကျုပ်က လေကောင်းလေသန့် ရတာကို ပြောတာ မဟုတ်ဘူးဗျ၊ တောထဲဆိုတော့ … ဟိုလေ .. သရဲတွေ ရှိတယ်ဗျ”

ဟူ၍ မောင်အောင်ဦးသည် ဘေးဘီဝဲယာ ပတ်ဝန်းကျင်အား ကြောက်ရွံ့သော မျက်လုံးများဖြင့် ကြည့်ရင်း ၎င်း၏ အဖိုးဖြစ်သူ ဦးသာအောင်အား တိုးညှင်းစွာ ပြောလိုက်လေ၏။

ထိုအခိုက် တိုက်ဆိုင်စွာပင် အစောင့်အရှောက်များနှင့် ဥစ္စာစောင့်များ ရှိသည်ဟူ၍ နာမည်ကြီးလှသော ရန်အောင်တောင်ပေါ်မှနေ၍ လွန်စွာ လွမ်းဆွေးဖွယ် ကောင်းလှသော တယောသံသည် ည သန်းခေါင်ယံအချိန်တွင် ထူးဆန်းစွာ ပေါ်ထွက်လာလေတော့၏။

ထိုအသံကို ကြားသောအခါ မောင်အောင်ဦးမှာ ကြက်သီးများပင် ထသွားပြီး ၎င်း၏ အဖိုးဖြစ်သူနားသို့ တိုး၍ ကပ်ထိုင်ကာ တိုးညှင်းစွာ မေးမြန်းလေ၏။

“အဘ၊ အဲ့ဒီ အသံက တောင်ပေါ်က လာတာလားဟင်”

ယင်းသို့ မေးလိုက်သောအခါတွင် အဖိုးကြီး ဦးသာအောင်မှ အေးဆေးစွာပင် -

“ဟုတ်တယ်လေ ငါ့မြေးရဲ့၊ တောင်ပေါ်က လာတာပဲကွ၊ တော်တော် လွမ်းစရာ ကောင်းသံ လက်သံပဲ ငါ့မြေးရဲ့”

ဟူ၍ ပြောလေရာ မောင်အောင်ဦးမှာ ၎င်း၏ အဖိုးဖြစ်သူ၏ အေးဆေးနေသော ဟန်အမူအယာကို အားမလို အားမရ ဖြစ်သွားပြီးနောက် -

“ဟာဗျာ အဘကလည်း၊ လက်သံက ကောင်းကောင်း မကောင်းကောင်း၊ အဲ့ဒါ သရဲ ခြောက်တာဗျ”
ဟူ၍ ပြောလိုက်လေရာ အဖိုးကြီး ဦးသာအောင်မှာ ၎င်း၏ မြေးဖြစ်သူ မောင်အောင်ဦးအား ကြည့်၍ တခွီးခွီး ရယ်မောလိုက်ပြီး -

“ငါ့မြေးနိုင်ရောကွယ်၊ သရဲ နေနေ ဘာနေနေပေါ့ကွာ၊ အဘ က လက်သံ ကောင်းလို့ ကောင်းကြောင်း ပြောတာပဲ၊ အဲ … ပြောရရင်၊ အဲ့ဒီ လက်သံလေးကို နားထောင်ချင်လို့ အဘက အခု ထိုင်နေတာပဲ ငါ့မြေးရဲ့”

ဟူ၍ ပြောလိုက်လေရာ မောင်အောင်ဦးမှာ အဖိုးဖြစ်သူ၏ စကားအား အံ့အား သင့်၍သွားလေတော့၏။

“ဗျာ …..။ အဘ က အဲ့ဒီ အသံကို အရင်ကလည်း ကြားနေရတာပေါ့နော်”

“ဟုတ်တယ်လေ ငါ့မြေးရဲ့၊ အရင်ကလည်း ကြားနေရတာပဲကွ”

“ဟာ … ဒါဆို အဘ ကို အဲ့ဒီ တောင်ပေါ်က သရဲက အဘ နေကတည်းက နေ့တိုင်း ခြောက်နေခဲ့တာပေါ့”

“အမလေး … ငါ့မြေးရယ်၊ အသံကြားရတိုင်း သရဲ ခြောက်တယ်လို့ချည်း ပြောနေတော့တာပါပဲလားကွ၊ ပြီးတော့ ပြောရဦးမယ် ငါ့မြေးရေ၊ အဲ့ဒီ အသံကို အဘ ကြားရတာ အဘ တစ်ယောက်တည်း ဟောဒီနေရာလေးကို လာနေကတည်းက မဟုတ်ပါဘူးကွယ်၊ ဒီအသံက လွန်ခဲ့တဲ့ ၁၀ ရက်၊ ၁၅ ရက်လောက်ကမှ ကြားရတဲ့ အသံပါကွ”

ဟူ၍ အဖိုးကြီးမှ ပြောလိုက်သော်လည်း မောင်အောင်ဦးမှာ တိုးလိုက် မြင့်လိုက်ဖြင့် ထွက်ပေါ်လာနေသော တယောသံအား သရဲ ခြောက်သည်ဟူ၍သာ ကြောက်ရွံ့နေသည့်အတွက် မိမိ ယခုကဲ့သို့ လာရောက် အိပ်မိခြင်းကိုပင် နောင်တရနေသကဲ့သို့ ရှိနေလေတော့သည်။ ထိုအခြင်းအရာအား ရိပ်မိသော အဖိုးဖြစ်သူမှ မောင်အောင်ဦးအား -

“ငါ့မြေးကတော့ကွယ် ကြောက်တတ်လိုက်တာ၊ ဒါနဲ့ အိပ်နေတဲ့လူဟာ မကြောက်တတ်ဘူးတဲ့ကွ၊ ငါ့မြေး မကြောက်ရအောင် သွားအိပ်ချေတော့”

ဟူ၍ ပြောလိုက်လေရာ မောင်အောင်ဦးမှာ အဖိုးဖြစ်သူ၏ စကားအား သဘောကျသွားပြီး “ဟုတ်လောက်တယ် အဘ၊ ကျုပ် ပြန်အိပ်တာပဲ ကောင်းတယ်ဗျာ” ဟူ၍ ပြောဆိုပြီးနောက် ထိုင်ရာမှထကာ မကြောက်အောင် ဇွတ်အတင်း အိပ်တော့မည်ဟူ၍ တဲအတွင်းသို့ သွားရောက်ရန် ဟန်ပြင်လေတော့၏။ ထိုအခါတွင် အဖိုးဖြစ်သူမှ -

“အင်း … ငါ့မြေး အိပ်တဲ့ နေရာကလည်း အဘ ထိုင်နေတဲ့ နေရာနဲ့စာရင် အဲ့ဒီ ရန်အောင်တောင်နဲ့ ပိုနီးသွားမလားပဲ”

ဟူ၍ တစ်ယောက်တည်း ရေရွတ်သလိုလိုဖြင့် ကြောက်ရွံ့နေသည့် မြေးဖြစ်သူအား စနောက်လိုက်လေရာ တဲအတွင်းသို့ ဝင်ရန် ဟန်ပြင်နေသော မောင်အောင်ဦးမှာ ဝင်ရနိုးနိုး အဖိုးဖြစ်သူဆီပဲ ပြန်သွားရနိုးနိုးဖြင့် ခြေတုံချတုံ ဖြစ်သွားပြီးနောက် “ဟာဗျာ .. အဘကလည်း” ဟူ၍ ပြောလိုက်လေတော့၏။

++++++++++++++++++

ထန်းရည်ဝိုင်း

တစ်နေ့သ၌ ရွက်လှရွာလေး၏ အနောက်ဖက်ရှိ ကိုကြက်ကြီး ပိုင်ဆိုင်သော ထန်းတောအတွင်း လူရွယ်တစ်စုသည် ဝိုင်းဖွဲ့ပြီး ထန်းရည်သောက်လျှက် ရှိသည်ကို တွေ့ရလေ၏။ ၎င်းတို့သည် လူပျို ကာလသားများ ဖြစ်ကြသည့် အားလျော်စွာ မည်သည့် မိန်းကလေး လှကြောင်းပကြောင်း၊ မည်သူနှင့် မည်သူကတော့ဖြင့် သမီးရည်စား ဖြစ်သွားကြပြီဖြစ်ကြောင်း၊ ရွာအတွင်းမှ မည်သည့် အပျိုမလေးကတော့ဖြင့် ချစ်စရာ အလွန်ကောင်းကြောင်း၊ မိမိ ကြိုက်နေမိကြောင်း … စသည့် မိန်းမနှင့် ဆက်စပ်သော စကားများအား ထန်းရည်သောက်ရင်း ပြောဆိုလျက် ရှိကြလေ၏။

အချို့သော လူရွယ်များကမူ ရွာအတွင်းမှ မည်သူ၏ ကြက်ဖကြီးသည် အခွပ် အလွန်ကောင်းကြောင်း၊ တစ်ဖက်ရွာမှ မည်သူ၏ ကြက်နှင့် အစမ်း တိုက်ကြည့်ရာ တစ်ဖက်ရွာမှ ကြက်မှာ ခွက်ခွက်လန်အောင် ရှုံးနိမ့်သွားခဲ့ကြောင်း၊ ထိုကြက်ဖကြီးအား ချက်၍ ထန်းရည်နှင့် မြည်းလိုက်ရပါလျှင် သာ၍ပင် ကောင်းလိမ့်မည် ဖြစ်ကြောင်း စသည်ဖြင့် ပြောဆိုနေကြလေ၏။

၎င်းတို့၏ ထန်းရည်ဝိုင်းသည် အတန်ငယ် ကြာလာသောအခါတွင် ထိုအထဲမှ လူရွယ်တစ်ယောက်မှ ကိုကြက်ကြီး၏ မိန်းမ မကြာခင် လာရောက်ချပေးသော ကြွက်ကြော်အား တစ်ချက်ဝါးလိုက်ပြီးနောက် စကား စလေ၏။

“ဟေ့ကောင်တို့ရေ … မင်းတို့ကို ကြုံတုန်းကြုံခိုက် ရန်အောင်တောင်ပေါ်က သရဲအကြောင်းကို ပြောရဦးမယ်ကွ”

ထိုအခါ ကျန်သည့် လူရွယ် လေးယောက်မှာ ရန်အောင်တောင် နှင့် သရဲ ဟူသော စကားများကြားလိုက်ရလျှင် လွန်စွာ စိတ်ဝင်စား သွားရကား ထိုစကား စသော လူရွယ်အား ကြည့်လိုက်ကြလေ၏။ ထိုအချင်းအရာအား ရိပ်မိသော လူရွယ်မှာ “အဟမ်း .. ဟမ်း … ဒီလိုကွ” ဟူ၍ ၎င်းပြောမည့် အကြောင်းအား ဆက်၍ မပြောသေးဘဲ ကြွက်ကြော်အား ကိုက်ဝါးနေပြန်လေ၏။ ထိုအခါ ကျန်လူရွယ်များမှ “ဘယ်လိုတုန်း ငါ့ကောင်ရဲ့၊ မြန်မြန်ပြောကွာ” ဟူ၍ ပြောကြလေတော့၏။

“ဒီလိုကွာ၊ ဟိုနေ့က ငါ့အဘနဲ့ တူတူ သွားအိပ်တယ်ကွ၊ မင်းတို့လည်း သိတယ် မဟုတ်လား၊ ငါ့အဘက အဲ့ဒီ ရန်အောင်တောင် နားမှာ တစ်ယောက်တည်း နေတာလေကွာ”

“မင်းကလည်းကွာ၊ အဲ့ဒါ သိနေတာပဲ၊ သရဲ ဘယ်လို ခြောက်တာတုန်း ဆိုတာသာ ပြော”

“အေးပါ၊ ပြောပါ့မယ်၊ အဲ့ဒီနေ့ ညသန်းခေါင်ကျော်ကျတော့ ဘယ်လို ဖြစ်တာတုန်း မသိပါဘူးဗျာ၊ ငါလည်း မနိုးစဖူး တစ်ရေးနိုးလာတာကွ၊ ငါလည်း မျက်လုံး ဖွင့်ကြည့်လိုက်ရော၊ လား .. လား .. တဲရှေ့က ကွပ်ပျစ်ပေါ်မှာ ငုတ်တုတ်ကြီးကွာ”

ယင်းသို့ လူရွယ်မှ ပြောလိုက်သောအခါ ကျန်လူရွယ်များမှာ မျက်လုံးများ ပြူးသွားကြလေ၏။

“ဟေ … ဟုတ်လားကွ၊ တောင်ပေါ်က သရဲက မင်းတို့ တဲကို လာခြောက်တာပေါ့”

“ငါ ပြောမှာက အဲ့ဒီ ငုတ်တုတ်ကြီးကိုလည်း တွေ့လိုက်ရော၊ ငါလည်း ကြက်သီးတွေ ထသွားတာပေါ့ကွာ”

လူရွယ်၏ စကားကြောင့် ကျန်သူများမှာ လွန်စွာ စိတ်ဝင်စားသွားကြဟန် ရှိကြပြီး လူရွယ် ပြောမည့် စကားများအား စောင့်ဆိုင်း နားထောင်လျှက် ရှိကြသည်ကို တွေ့ရလေ၏။ ထိုအခါ လူရွယ်မှ ဆက်ပြောပြန်လေသည်။

“ဒါနဲ့ကွာ၊ ငါလည်း ဘာဖြစ်ဖြစ် ဆိုပြီး အဲ့ဒီ သရဲကို ဓာတ်မီးနဲ့ လှမ်းထိုးလိုက်တယ်ကွာ”

လူရွယ်သည် ဆက်လက် ပြောခြင်း မပြုသေးဘဲ ကြွက်ကြော်အား တစ်ကိုက်ကိုက်ပြီး ထန်းရည်အား ဂွက်ခနဲ မော့လိုက်ပြန်လေ၏။ ပြီးနောက် “ဟေ့ကောင်တွေ၊ ထန်းရည်က ကုန်တော့မယ်ဟ၊ ငါ့မှာလည်း ပိုက်ဆံက ကုန်ပြီး ဘယ်လို လုပ်ကြမတုန်း” ဟူ၍ စောစောက ပြောသည့် စကားနှင့် မည်သို့မျှ သက်ဆိုင်ခြင်း မရှိသော စကားများကို ပြောဆိုလိုက်လေ၏။ ထိုအခါတွင် ကျန်လူများမှာ လူရွယ် ပြောသည့် စကားအား ဂရုထားခြင်း မပြုဘဲ “မင်း ဓာတ်မီးနဲ့ ထိုးကြည့်လိုက်တော့ ဘယ်လိုကြီး တွေ့ရတုန်း၊ အမွှေးဖွားဖွားနဲ့ နီနီစုပ်စုပ်ကြီးလား” ဟူ၍ မေးမြန်းကြလေ၏။

ထိုလူများ၏ အမေးကို လူရွယ်မှ အင်း မလုပ်၊ အဲ မလုပ်ဘဲ “ထန်းရည်ကလည်း ကုန်တော့မယ်ကွာ၊ သောက်ကလည်း ထပ်သောက်ချင်သေးတယ်၊ ပိုက်ဆံကလည်း ကုန်ပြီ” ဟူ၍ တစ်ယောက်တည်း ရေရွက်သည့်ဟန်ဖြင့် ပြောလေ၏။ ထိုအခါတွင် ကျန်လူများမှာ အထာပေါက်သွားပြီး လူရွယ်အား မကျေမနပ် တစ်ချက် ကြည့်လိုက်ပြီးနောက် -

“ခွီးထဲမှဘဲ မင်းကလည်း ဇာတ်လမ်းကို မဆက်သေးဘဲနဲ့ ထန်းရည် ကုန်တော့မယ်ပဲ ပြောနေတယ်၊ အေးပါ၊ ထားပါတော့” ဟူ၍ ပြောဆိုလိုက်ပြီး တဲအတွင်းမှ ထန်းသမား ကိုကြက်ကြီးအား “ဗျို့ … ကိုကြက်ကြီး ထန်းရည် တစ်မြူလောက် ထပ်ချပါဦးဗျို့” ဟူ၍ အော်ဟစ် လိုက်လေတော့၏။ လူရွယ်မှာ ကိုကြက်ကြီး လာ၍ ချပေးသော ထန်းရည်အိုးတွင်းမှ ထန်းရည်အား ၎င်း၏ ခွက်အတွင်း ငှဲ့လိုက်ပြီးနောက် တစ်ကြိုက် မော့လိုက်လေ၏။

“အားပါးပါး … ကောင်းလိုက်တဲ့ ထန်းရည်၊ သူများ တိုက်လို့လားတော့ မသိဘူး၊ ကောင်းချက်ကတော့ လွန်လွန်းတယ်”

“ဟေ့ကောင် လျှာမရှည်နဲ့တော့၊ မင်းဇာတ်လမ်းကို ထပ်ပြော”

“အေးပါကွာ၊ မင်းတို့ကလည်း ဇွတ်ပဲ၊ အဲ .. ဒါနဲ့ ငါပြောတာ ဘယ်နား ရောက်သွားပြီတုန်း”

“မင်းက သရဲကို ဓာတ်မီးနဲ့ လှမ်းထိုးလိုက်တယ်ကွာ၊ အဲ့ဒီနား ရောက်သွားပြီ”

“အော် … အေး၊ ငါလည်း အဲဒီလို ဓာတ်မီးနဲ့ လှမ်းထိုးလိုက်ရော၊ လား … လား …၊ သူက ဆေးလိပ်ကြီးတောင် ဖွာပြလိုက်သေးတယ်ကွ”

ကျန်လူများအား လူရွယ်၏ စကားအား စိတ်ဝင်တစား နားထောင်နေကြလေ၏။ ၎င်းတို့မှာ ရန်အောင်တောင်မှ အခြောက်အလှန့် ဇာတ်လမ်းများအား ကြားဖူးကြသော်လည်း ကိုယ်တိုင် ကြုံတွေ့ခဲ့တော့ မရှိခဲ့ပေ။ ယင်းကြောင့် ၎င်းတို့၏ သူငယ်ချင်းဖြစ်သူ၏ ကိုယ်တွေ့ ဇာတ်လမ်းအား စိတ်ဝင်တစား နားထောင် နေကြခြင်း ဖြစ်လေ၏။

“အဲဒီတော့ ဘယ်လို ထပ်ဖြစ်သေးတုန်း”

“အဲ့ဒီလိုကွာ၊ ဓာတ်မီးနဲ့ လှမ်းထိုးလိုက်တဲ့ ငါ့ကို ကြည့်ပြီး ဆေးလိပ်မီးနဲ့ ဖွာပြတာလည်း တွေ့ရော၊ မင်းတို့ သူငယ်ချင်းပဲ၊ ဘယ်ရမတုန်းကွ၊ တဲ ထဲက ထွက်ပြီး ကွပ်ပျစ်ဆီ လျှောက်သွားတာပေါ့”

“ဟ … ဟ၊ ဟေ့ကောင် ဒါတော့ လွန်ပြီ ထင်တယ်ကွာ၊ ရှင်းရှင်း ပြောရရင် မင်းက ငကြောက်မှန်း ငါတို့ သိပြီးသား၊ အဲ့ဒါတော့ မဖြစ်နိုင်ဘူး ဟေ့ကောင်၊ လာ မဖြီးနဲ့”

ဟူ၍ အခြားသူများမှ လူရွယ်အား ပြောကြလေရာ လူရွယ်မှာ သူ၏ သွားကြီးအား ဖြီးပြလိုက်ပြီးနောက် -

“အဟဲ … မင်းတို့ကလည်း၊ ငါ တကယ် သွားခဲ့တာကွ၊ ဘာလို့ဆိုတော့လေ၊ အဲဒီ ဆေးလိပ်ကို ဖွာပြတာ ငါ့အဘ ဖြစ်နေလို့ပဲကွ၊ အဟဲ၊ ငါ တစ်ရေးနိုးတော့ အဘကို မတွေ့ရဘူးလေကွာ၊ ဒါနဲ့ ငါလည်း ကြောက်ကြောက်နဲ့ အဘများ ဖြစ်နေမလားဆိုပြီး ဓာတ်မီးနဲ့ လှမ်းထိုးကြည့်တော့ အဲ့ဒီ ငုတ်တုတ်ကြီးက အဘ ဖြစ်နေတာကွ၊ အဟဲ .. အဟီး”

ဟူ၍ စပ်ဖြီးဖြီး အမူအယာဖြင့် ပြောလိုက်လေတော့၏။ ယင်း လူရွယ်မှာ အောင်မောင်ဦး ဖြစ်ကြောင်းကိုမူ စာဖတ်သူတို့ သိပြီး ဖြစ်ပါလိမ့်မည်။ မောင်အောင်ဦးမှ ၎င်း၏ အဘဖြစ်သူနှင့် သွားရောက်အိပ်စက်သည့် နေ့က ကြားခဲ့ရသော တောင်ပေါ်မှ တယောသံ အကြောင်းကို ပြန်လည် ပြောပြနေခြင်း ဖြစ်ပါ၏။

ယင်းနောက်တွင် မောင်အောင်ဦးမှာ သူ၏ သူငယ်ချင်းများ ဖြစ်ကြသော ဖိုးလေး၊ ငအောင်၊ ရဲကြီးနှင့် မိုးကို တို့အား ၎င်း ကြားခဲ့ရသော တောင်ပေါ်မှ တယောသံ အကြောင်းကို ပြောပြလေ၏။ ထိုအခါ ၎င်း၏ သူငယ်ချင်းများမှ တယောသံ ဖြစ်သည့်အတွက် ဥစ္စာစောင့် မိန်းမ မဖြစ်နိုင်ကြောင်း၊ ဥစ္စာစောင့် ယောက်ျားသာ ဖြစ်နိုင်ကြောင်း ထင်မြင်ချက် ပေးကြလေ၏။

ပြီးနောက်တွင် ၎င်းတို့ လူရွယ်တစ်စုသည် လူရွယ်ပီပီ စူးစမ်းလိုကြသည့်အလျောက် ကြောက်ပင် ကြောက်လင့်ကစား အဘိုးကြီး ဦးသာအောင်၏ စကားအရ ညစဉ် သန်းခေါင်ယံတွင် ပေါ်ထွက်တတ်သည့် တယောထိုးသည့် ဥစ္စာစောင့်ကို သွားရောက် ချောင်းမြောင်း ကြည့်ရှုလိုသည့် အားလျော်စွာ အချင်းချင်း ခေါင်းချင်းဆိုင် တိုင်ပင်ကြလေတော့၏။

၎င်းတို့မှာ ငါးယောက်အဖွဲ့ ဖြစ်သည့်အတွက် ကြောက်စရာ မလိုကြောင်း၊ အဆိုပါ တယောထိုးသည့် ဥစ္စာစောင့်အား တွေ့ရပါက ရွာထဲတွင် လှည့်ပတ်၍ ကြွားနိုင်မည် ဖြစ်ကြောင်း၊ အခန့်မသင့်၍ တစ်ခုခု ဖြစ်ပါကလည်း ထိုတောင်အနီးတွင် အဘဖြစ်သူ ဦးသာအောင်၏ တဲကလေး ရှိနေသဖြင့် ထိုတဲဆီသို့ ထွက်ပြေး၍ ရနိုင်ကြောင်း စသည်ဖြင့် ၎င်းတို့၏ စွန့်စားခန်းအတွက် အသေးစိတ် အချက်များကို ခေါင်းချင်းဆိုင် တိုင်ပင်နေကြလေတော့၏။

+++++++++++++++++++++

သူတောင်းစားတစ်စု ရောက်လာခြင်း

တစ်နေ့တစ်၌ ရွက်လှရွာသို့ သွားရာ တောလမ်းကလေးအတိုင်း လူတစ်စုသည် လျောက်လှမ်းလာသည်ကို တွေ့ရလေ၏။ ၎င်းတို့သည် နွမ်းလျနေပြီဖြစ်သော အဖြူရောင် အဝတ်များကို ဝတ်ဆင်ထားပြီး ၎င်းတို့၏ ဦးခေါင်းကိုလည်း အဖြူရောင် အဝတ်များအား ခေါင်းပေါင်းသဖွယ် ပြုလုပ်ကာ ဝတ်ဆင်ထားကြသည်ကို တွေ့ရလေ၏။ ၎င်းတို့ထဲမှ အချို့သည် အိတ်ကြီးနှစ်လုံးအား တောင်းသဖွယ်ပြုကာ တံပိုးဖြင့် လျှို၍ ထမ်းထားကြသည်ကို တွေ့ရလေသည်။

၎င်းလူစုသည် ရန်အောင်တောင်နှင့် ခပ်လှမ်းလှမ်းတွင် ရှိသော လမ်းနံဘေး ဇရပ်လေးသို့ ရောက်သောအခါ ဇရပ်ပေါ်သို့ တက်ရောက်၍ အပန်းဖြေနေကြသည်ကို တွေ့ရလေ၏။ ၎င်းတို့မှာ တောအရပ်ဒေသများတွင် တစ်ရွာဝင် တစ်ရွာထွက်ဖြင့် လှည့်လှည် တောင်းရမ်းလေ့ ရှိကြသော သူတောင်းစားများပင် ဖြစ်ပေသည်။ အဆိုပါ သူတောင်းစားအုပ်စုတွင် ယောက်ျားကြီး သုံးယောက်နှင့် မိန်းမ နှစ်ယောက် တို့ ပါရှိလေ၏။

“ဖိုးကျော်ရေ …၊ ဟော .. ဟိုက မြင်နေရတာ ဒီအနီးအနား တစ်ဝိုက်မှာ နာမည်ကြီးတဲ့ ရန်အောင်တောင် ဆိုတာပေါ့၊ တောင်ပေါ်က ထုံးဖြူဖြူစေတီလေးကတော့ဖြင့် ရန်အောင်စေတီပေါ့ကွာ”

ယင်းသို့ သူတောင်းစား အုပ်စုထဲတွင် အသက်အကြီးဆုံး ဖြစ်ဟန်ရှိသော သူတောင်းစားကြီး တစ်ဦးမှ ပြောလိုက်သော အခါတွင် ဖိုးကျော် ဆိုသူ အသက် (၃၀) အရွယ် သူတောင်းစား မှာ ရန်အောင်တောင်ဆီသို့ လှမ်း၍ ကြည့်လိုက်လေ၏။

“ရန်အောင်တောင် ဆိုတာ ဒီတောင်ကိုးဗျ ….။ ကိုခင်ရေ …. ရန်အောင်စေတီလေးကတော့ဖြင့် ထုံးဖြူဖြူ စေတီလေး ဆိုပေမယ့် သပ္ပါယ်သားဗျ”

“သပ္ပါယ်တာပေါ့ ဖိုးကျော်ရယ်၊ ဒါ့ထက် ကျုပ်တို့ ဒီဇရပ်မှာပဲ စခန်းချပြီး ရွက်လှရွာကို ဝင်ကြတာပေါ့”

“ဟုတ်ပါပြီလေ၊ ကိုခင် သဘောပါပဲ”

ထိုသို့ဖြင့် အဆိုပါ သူတောင်းစား အုပ်စုသည် ရန်အောင်တောင်နှင့် မနီးမဝေး ခရီးလမ်းနံဘေးတွင် ခရီးသွားများ အနားယူ အပန်းဖြေနိုင်ရန် ဆောက်လုပ်ထားသည့် ဇရပ်ကလေးပေါ်တွင် နေထိုင်ရင်းဖြင့် နေ့ခင်း အချိန်များတွင် ရွက်လှရွာကလေး ဆီသို့ သွားရောက်ကာ တောင်းရမ်းခြင်းကို ပြုကြလေ၏။

++++++++++++++++++++++++++

အဆိုပါ သူတောင်းစားအုပ်စု ရောက်ရှိပြီး နှစ်ရက်ခန့်အကြာ ညခင်းတစ်ခုတွင် အောင်ကို ဟူသော သူတောင်းစား ဖြစ်သူမှ ဤသို့ စကားစလေ၏။

“ဒီက ကိုခင်တို့၊ ဖိုးကျော်တို့၊ ခင်မြတို့၊ တင်စိန်တို့ကို ကျုပ်တစ်ခုလောက်တော့ ပြောရဦးမယ်ဗျ”

“ပြောပါဗျာ ….၊ ပြောပါ”

“ဒီလိုဗျ ….။ ကျုပ်တို့ ဒီဇရပ်လေးမှာ နေကြတာ နှစ်ရက်ရှိသွားပြီ မဟုတ်လား၊ ဒီနေ့ရောဆို သုံးရက်ပေါ့ဗျာ။”

“အင်း ….၊ ဟုတ်ပါတယ်.. ဒါ့ထက် ဘာဖြစ်လို့လဲ အောင်ကိုရဲ့”

“ဒီလိုဗျ …..၊ ကျုပ်တို့ စရောက်တဲ့ ညကရော၊ မနေ့ညကပါ ကျုပ် တယောသံ ကြားမိသလားလို့၊ ဟို .. ကိုခင်ပြောတဲ့ ရန်အောင်တောင်ပေါ်က လာတဲ့ တယောသံလို့ ကျုပ်တော့ ထင်မိတယ်ဗျ”

ယင်းသို့ ပြောလိုက်သောအခါ ကိုခင် ဆိုသူမှ အတန်ငယ် ပြုံးလိုက်သည်ကို တွေ့ရလေ၏။ ကျန်သုံးယောက်ကမူ အောင်ကို၏ စကားအား ထောက်ခံနေကြသည်ကို တွေ့ရလေ၏။ အဘယ်ကြောင့်ဆိုသော် ၎င်းတို့လည်း ညဘက် အချိန်များတွင် တောင်ပေါ်မှ တယောသံအား ကြားမိကြခြင်းကြောင့်ပင် ဖြစ်လေ၏။

“ကိုခင်က ဘာလို့ ပြုံးတာတုံးဗျ။ ကျုပ်ပြောတာ မယုံလို့လား”

“မဟုတ်ရပါဘူး အောင်ကိုရယ်၊ ကျုပ်တွေးထားတာနဲ့ မောင်ရင် ပြောတာနဲ့ အံကိုက်ဖြစ်သွားလို့ ကျုပ်က ပြုံးမိတာပါ”

“ဒါဆို ကိုခင်လည်း တယောသံ ကြားရတယ်ပေါ့”

“ဟုတ်တယ် အောင်ကို၊ ကျုပ်လည်း ဒီတယောသံကို နှစ်ရက်ဆက် ကြားခဲ့ရပါတယ်။ ဒီနေ့ညရောပါ ထပ်ကြားရလို့ကတော့ဖြင့် ကျုပ် တွေးထားတာက ရန်အောင်တောင်ပေါ်တက်ပြီး ကိုယ်တိုင်ကိုယ်ကျ သွားရောက် စုံစမ်းကြဖို့ပဲ။ ဒီတော့ကာ အကယ်၍များ ဒီနေ့ညပါ တယောသံ ထပ်ကြားရရင် နက်ဖြန်ခါ ညဘက်မှာ ကျုပ်နဲ့ ဖိုးကျော်က တောင်ပေါ်ကို သွားပြီး တယောသံပိုင်ရှင်ကို စုံစမ်းမယ်။ အောင်ကို ကတော့ ခင်မြနဲ့ တင်စိန် အဖော်ရအောင် နေခဲ့ရမယ်”

ယင်းသို့ ကိုခင် ဆိုသူမှ ပြောလိုက်သောအခါတွင် ကျန်လူများမှာ အမိန့်ကို နာခံကြသည့် အသွင်ဖြင့် ခေါင်းညိမ့် လိုက်ကြသည်ကို တွေ့ရလေတော့၏။

++++++++++++++++++++++++

သူတို့ ချီတက်ကြလေပြီ

တစ်နေ့သ၌ ညသန်းခေါင်ယံ အချိန်ခန့်တွင် လူတစ်စုသည် တယောသံ ထွက်ပေါ်လာတတ်သည်ဟု နာမည်ကြီးနေသော ရန်အောင်တောင် ရှိရာဆီသို့ ဦးတည် လျောက်လှမ်းလာကြသည်ကို တွေ့ရလေ၏။ အဆိုပါ လူစုမှာ ငါးယောက်ပါသော လူစု ဖြစ်ကြောင်းကို လမိုက်ည ဖြစ်သော်လည်း ကြယ်ရောင်တို့၏ လင်းအားဖြင့် မြင်တွေ့နေရပေ၏။ ၎င်းတို့သည် လက်နှိပ်ဓါတ်မီးတစ်လက်အား အသုံးပြုကာ လျောက်လှမ်း လာကြသည်ကိုလည်း တွေ့ရလေ၏။

ရာသီအားဖြင့် နွေရာသီ ဖြစ်သည့်အတွက် ယာခင်းများမှာ သီးနှံများ စိုက်ပျိုးထားခြင်း မရှိပေ။ ယင်းကြောင့် အဆိုပါ ယာခင်းများမှာ သဲတော ဟင်းလင်းပြင်ကြီးသာ ဖြစ်၍ နေပေ၏။ ထိုလူငါးယောက်မှာ ယာခင်း သဲတောများကို ဖြတ်လျက် ရန်အောင်တောင် ဆီသို့ ဦးတည် လျောက်လှမ်းလာနေခြင်းပင် ဖြစ်ပေ၏။

“ဟေ့ကောင်တို့ရေ … ငါဖြင့် လာသာ လာရတာ၊ ခပ်လန့်လန့်ပဲဟ”

“ဟေ့ကောင် ဖိုးလေး၊ မင်း လန့်နေရင်လည်း ငါတို့နဲ့ ဆက်မလိုက်နဲ့ကွာ၊ တစ်ယောက်တည်း ဒီကနေ လှည့်ပြန်တော့”

“ဒီလိုတော့ ဘယ်ဖြစ်မလဲကွ”

“အေး … တစ်ယောက်တည်း မပြန်ရဲရင်လည်း ဘာမှ လန့်မနေနဲ့၊ ဒါပဲ”

၎င်းတို့ လူစုမှာ ရွက်လှရွာမှ လူရွယ်များ ဖြစ်ကြသည့် အောင်ဦး၊ ဖိုးလေး၊ ငအောင်၊ ရဲကြီးနှင့် မိုးကို တို့ပင် ဖြစ်ကြလေ၏။ ၎င်းတို့သည် ကြိုတင် ကြံစည်ထားသည့်အတိုင်း ရန်အောင်တော်ပေါ်မှ ညစဉ် သန်းခေါင်ယံအချိန်တွင် ပေါ်ထွက်လာတတ်သည့် တယောသံ ပိုင်ရှင်အား စူးစမ်းရန် လာရောက်နေခြင်းပင် ဖြစ်ပါသည်။

၎င်းတို့ လူစုသည် အစ ပထမ ရွာမှ ထွက်လာစတွင် စကား တပြောပြောနှင့် လျောက်လှမ်းလာခဲ့ကြသော်လည်း ရန်အောင်တောင်နှင့် နီးကပ်လာသောအခါတွင် ၎င်းတို့ စကားများသည် တိုးလျ လာသကဲ့သို့ အတန်ငယ်လည်း တိတ်ဆိတ်နေပေ၏။ ၎င်းတို့သည် ရန်အောင်တောင်ခြေဆီသို့ ရောက်လာသောအခါတွင် တောင်ပေါ်ဆီသို့ ချက်ချင်း တက်ရောက်ခြင်း မပြုသေးဘဲ တောင်ခြေတွင် မျက်နှာချင်းဆိုင် ဝိုင်းဖွဲ့၍ တစ်ဦးနှင့် တစ်ဦး တီးတိုးပြောဆိုကာ ထိုင်နေကြသည်ကို တွေ့ရလေ၏။

“ဟေ့ကောင် ရဲကြီး၊ တယောသံ ကြားရတာနဲ့ မင်းက ရှေ့ဆုံးက တက်ရမှာနော်”

“အေးပါဟ၊ ငါ သိပါတယ်”

“သိရင်လည်း ပြီးရော၊ ငအောင် က ရဲကြီးနောက်ကနော်”

“မင်းကလည်း စီစဉ်ထားတဲ့အတိုင်း သိပြီးသားကို လျောက်ပြောနေသေးတယ်၊ မင်း ကြောက်နေလည်း အေးအေးဆေးဆေး နေပါကွာ၊ အဲ … ဒါနဲ့ ပိတ်ဆုံးက လိုက်တဲ့ကောင်နောက်နေ ဘွားခနဲ ပေါ်လာလို့ကတော့ .. အဟိ .. ခွိခွိ”
“ဟေ့ကောင် ရဲကြီး ပေါက်ကရ လျောက်မပြောနဲ့ကွာ၊ မင်း ပြောတာနဲ့ ကြောချမ်းချင်သလိုတောင် ဖြစ်လာပြီ”

၎င်းတို့၏ အစီအစဉ်အရ တောင်ပေါ်မှ တယောသံ ထွက်ပေါ်လာသည်နှင့် တောင်ပေါ်သို့ တိတ်တဆိတ် တက်ရောက်ကြမည် ဖြစ်လေသည်။ ယင်းသို့ တက်ရောက်သည့်အခါတွင် ရဲကြီးမှ ရှေ့ဆုံးမှ သွားရမည် ဖြစ်ပြီး ၎င်းနောက်မှ ငအောင်၊ မိုးကို၊ အောင်ဦး၊ ဖိုးလေး တို့မှ အစဉ်အတိုင်း လိုက်ကြရန် ဖြစ်လေသည်။

တောင်ပေါ်မှ တယောသံ ပိုင်ရှင်မှာ ယောက်ျားပင် ဖြစ်စေ၊ မိန်းမပင် ဖြစ်စေ ၎င်းတို့အား တွေ့ရှိသွားပြီး ရန်မူလာပါက အသင့် ယူဆောင်လာကြသော လက်ကောက်ဝတ်ခန့် တုတ်များဖြင့် ပြန်လည် တိုက်ခိုက်ကြမည် ဖြစ်လေသည်။ အကယ်၍ အခြေမလှပါမူ အောင်ဦး၏ အဖိုးဖြစ်သူ ဦးသာအောင် နေထိုင်သော တဲဆီသို့ ပြေးကြမည် ဖြစ်လေ၏။ ဤသည်မှာ ၎င်းတို့၏ အစီအစဉ် ဖြစ်လေသည်။

++++++++++++++++++

“ဟေ့ကောင်တွေ ဟိုမှာ .. ဟိုမှာ … ကြည့်စမ်းပါဦး”

မိုးကို ဆိုသူ လူရွယ်မှ တစ်နေရာအား လက်ညိုးညွှန်၍ ပြလိုက်ခြင်း ဖြစ်ပါသည်။ ၎င်း ညွှန်ပြသည့် နေရာဆီသို့ အခြားသော လူရွယ်များမှာ လှမ်း၍ ကြည့်လိုက်ကြလေ၏။ မိုးကို ညွှန်ပြသည့် အရာမှာ ကြယ်ရောင် အလင်းအောက်တွင် မည်းမည်း သဏ္ဍာန်နှစ်ခုသည် ရွှေ့လျားနေခြင်းပင် ဖြစ်လေ၏။ အဆိုပါ မည်းမည်း သဏ္ဍာန် နှစ်ခုဆီမှ တစ်ခါတစ်ရံတွင် လင်းခနဲ ဖြစ်ဖြစ်သွားတတ်သေး၏။

“ဟာ .. တောင်ပေါ်တက်ပြီး တယောထိုးမယ့် သရဲတွေလား မသိဘူးကွ၊ ငါတို့ ပြေးကြရအောင်ကွာ”

“အရေးကြီး ဒီငကြောက်ကလည်း တစ်မျိုးပဲ၊ အဲဒါ သရဲတွေ မဟုတ်လောက်ဘူးဟ၊ သူတို့ဆီက တစ်ချက်တစ်ချက် လင်းလာတာ ဓါတ်မီးအရောင်ပဲ ဖြစ်ရမယ်ကွ”

“ငအောင် ပြောတာ ဟုတ်လောက်တယ်၊ ဓါတ်မီး ကိုင်ထားပုံထောက်တော့ လူတွေပဲ ဖြစ်ရမယ်၊ ငါတို့ ရွာက ကိုကြီးငတက်တို့များလား မသိဘူး”

“အာ .. ကိုကြီးငတက်က ဒီအချိန်ဆို ထန်းရည် မူးပြီး အိပ်နေလောက်ပြီ၊ ငါ သူ့ကို ညနေက တွေ့တုန်းကတောင် တော်တော် မူးနေပြီဟ”

“ဒါဖြင့် ဘယ်သူတွေ ဖြစ်ကြမတုန်းကွ”

“ဒါတော့ ငါတို့ စောင့်ကြည့်ရမှာပဲ၊ ငါတို့ ဟိုနားကို သွားပုန်းနေရအောင်၊ ဓါတ်မီးတော့ မထိုးကြနဲ့နော့”

ယင်းသို့ဖြင့် ၎င်းတို့ လူရွယ်တစ်စုသည် တောင်ခြေနှင့် မလှမ်းမကမ်းတွင် ရှိနေသော ထန်းပင်များနောက်သို့ သွားရောက် ပုန်းအောင်ကာ အဆိုပါ မည်းမည်းသဏ္ဍာန် နှစ်ခုအား စောင့်ကြည့်နေကြလေ၏။ ထို မည်းမည်းသဏ္ဍာန် နှစ်ခုသည် တဖြည်းဖြည်းနှင့် နီးသထက် နီးလာသောအခါတွင် ၎င်းတို့၏ သဏ္ဍာန်မှာ ပို၍ ပီပြင်လာလေ၏။ လူရွယ်တစ်စု စောင့်ကြည့်နေသည့် နေရာနှင့် မလှမ်းမကမ်းသို့ ရောက်ရှိလာသည့်အခါတွင် အဆိုပါ မည်းမည်းသဏ္ဍာန် နှစ်ခုမှာ လူနှစ်ယောက် ဖြစ်ကြောင်းကို သိရှိခွင့် ရလိုက်လေ၏။

“ငါတို့ ထင်တဲ့အတိုင်း လူတွေပဲကွ၊ ငါတို့ ဘယ်လို ဆက်လုပ်ကြမတုန်း”

“ဒါမှ ဂွကျတာပဲကွာ၊ ဒီလူတွေက ဒီအချိန်ကြီးမှ တိုက်တိုက်ဆိုင်ဆိုင်ကွာ တောင်ခြေကို ဘာလာလုပ်ကြသလဲ မသိပါဘူး”

“ဟေ့ကောင် … ဟေ့ကောင် .. တောင်ခြေကို မဟုတ်ဘူး .. ဟိုမှာ တောင်ပေါ်ကို တက်သွားကြပြီတွေ့လား”

“ငါ ထင်တဲ့အတိုင်း တယောထိုးမယ့် သရဲတွေလည်း မသိဘူးနော်”

“အာ … ဖိုးလေးကလည်း၊ မင်းကလည်း တစ်ဆိတ်ရှိ သရဲဆိုတာကြီးပဲ၊ မင်း မမြင်ဘူးလား၊ လူတွေမှန်း သိရက်နဲ့”

“သရဲတွေကလည်း လူလိုပဲ ဖြစ်မှာပေါ့ကွ၊ ငါတို့က အခု လူရုပ်ပုံစံပဲ မြင်ရတာကို၊ အနီးကပ် မြင်ရတာမှ မဟုတ်တာ၊ တော်ကြာနေ သူတို့မှာ အစွယ်တွေ ဘာတွေ ပါနေရင် ဘယ်လို လုပ်မလဲ”

“မင်း ပါစပ် ပိတ်ထားပါဦး ဖိုးလေးရာ၊ အခု ငါတို့ ဘယ်လို ဆက်လုပ်ကြမတုန်း”

“ဒီလို လုပ်ရအောင်ကွာ၊ ငါတို့ အဲဒီလူနှစ်ယောက်ကို မလိုက်တော့ဘူး၊ အစီအစဉ်အတိုင်းပဲ တယောသံကြားရင် အပေါ်ကို တက်ကြမယ်။ ဒါပေမယ့် သတိတော့ ထားသွားရမယ်ကွ၊ စောစောက နှစ်ယောက်က ဘာမှန်း ညာမှန်း သိတာ မဟုတ်ဘူး”

“အေး .. ဒါပဲ ကောင်းတယ်၊ တယောသံ ကြားအောင် ဒီနေရာကပဲ ငါတို့တွေ ထပ်စောင့်ကြရအောင်ကွာ”

++++++++++++++++++++

ငါးယောက်ပါသော လူရွယ်အုပ်စုသည် ရန်အောင်တောင်ပေါ်ဆီမှ ညသန်းခေါင်းယံ အချိန်များတွင် ပေါ်ထွက်လာတတ်သည့် တယောသံအား စောင့်မျှော်နေရင်းဖြင့် အချိန်အားဖြင့် နာရီဝက်ခန့်အကြာတွင် တစ်ယောက်သော လူရွယ်မှ စကားစလေ၏။

“ဟေ့ကောင်တို့ရေ .. ခြင်တွေကလည်း ဆော်သဟ၊ တောင်ပေါ်က တယောသံကလည်း စောင့်ပါမှ ထွက်ကို မလာသေးဘူး”

“စိတ် ရှည်ရှည်ထားစမ်းပါ ငအောင်ရာ၊ အချိန်တန် ထွက်လာမှာပေါ့”

“စောင့်တော့ စောင့်နေတာပဲဟ၊ ဒါနဲ့ ဟို မည်းမည်းနှစ်ယောက်လည်း ပြန်ဆင်းလာတာ မတွေ့ရသေးဘူးနော့”

ထိုသို့ ငအောင် ဆိုသူ လူရွယ်မှ ပြောလိုက်သော အခါတွင် ရဲကြီး ဆိုသူ လူရွယ်မှ ပြန်လည်၍ ပြောလေ၏။

“ငါလည်း အဲဒါပဲ စဉ်းစားနေတာကွ၊ အဲဒီ မည်းမည်းနှစ်ယောက်က ဘာတွေတုံး။ ဟိုငကြောက် ဖိုးလေးပြောသလို တယောထိုးမယ့် သရဲတွေဆိုလည်း တယောသံက ကြားလာရမှာပေါ့ကွ။ အခုဟာက ဘယ်လို တွေးရမှန်းကို မသိဘူး”

“ငါအထင်တော့ တောင်ပေါ်မှာ နေတဲ့ သရဲတွေများလား မသိဘူး။ ငါတို့ကို မြင်လို့ အယောင်ပြပြီး ခြောက်တာနေမှာ”

ယင်းသို့ ဖိုးလေး ဆိုသူ လူရွယ်မှ ပြောလေရာ …

“ဟေ့ကောင် ဖိုးလေး၊ မင်းကလည်း မည်းမည်းမြင်ရင် သရဲကြီး ပြောနေတော့တာပဲ။ မင်း မလိုက်လာရင် တော်တော်ကောင်းမှာ”

“ဟေ့ကောင် အောင်ဦး၊ ငါက သရဲထင်လို့ သရဲလို့ပြောတာ ဘာဖြစ်တုန်းကွာ”

“အေး .. ဘာမှ မဖြစ်ဘူး ဖိုးလေး၊ မင်းကို ကြောက်တတ်လွန်းလို့ ပြောနေတာ”

ထိုအခါ ရဲကြီးဆိုသူမှ ပြောလေ၏။

“တော်ပါတော့ကွာ။ ဖိုးလေးပြောတာ ဂရုစိုက်မနေနဲ့၊ ငါတို့ ဘယ်လို ဆက်လုပ်ကြဦးမလဲ ဆိုတာကိုပဲ ပြောကြရအောင်၊ အခုဟာက ငါတို့ အစီအစဉ်တွေကိုတောင် ပြောင်းရတော့မလို ဖြစ်နေပြီ”

“အစီအစဉ်တော့ ပြောင်းလို့ မဖြစ်ဘူးကွ၊ ဒါပေမယ့် နည်းနည်းတော့ ပြောင်းရမယ်ထင်တယ်”

“လုပ်စမ်းပါဦး မိုးကို ရာ .. ဘယ်လို နည်းနည်း ပြောင်းရမှာတုံး”

“ဒီလိုကွာ၊ ငါတို့ ထပ်စောင့် မနေနိုင်တော့ဘူး၊ ခြင်တွေလည်း တော်တော်ကိုက်လာပြီ၊ ငါတို့ အကြောင်းသိရအောင် တောင်ပေါ် တက်ကြည့်ကြရအောင်ကွာ”

ယင်းသို့ မိုးကို ဆိုသူ လူရွယ်မှ အကြံပြုလိုက်သော အခါ အခြားသော လူရွယ် လေးယောက်မှာ အတန်ငယ် စဉ်းစားကြပြီးနောက် မိုးကို၏ အကြံကို လက်ခံ အတည်ပြုလိုက်ကြလေ၏။ ၎င်းနောက် လူရွယ်အုပ်စုသည် လက်နက်များ အဖြစ် အသုံးပြုရန် ယူဆောင်လာသော သစ်သားချောင်းများအား ကိုင်စွဲလျက် တောင်ပေါ်သို့ တက်ရောက်ရန် ခြေလှမ်း ပြင်လိုက်ကြလေတော့၏။

++++++++++++++++++++

ညသည် လမိုက်ည ဖြစ်သည့်အတွက် လ မသာပေ။ ပတ်ဝန်းကျင် တစ်ခုလုံးလည်း မှောင်မဲနေလေ၏။ သို့ရာတွင် ကြယ်ရောင်တို့ကြောင့် အတန်ငယ်တော့ လင်းလက်နေသည်ဟု ဆိုရပေမည်။ အချိန်သည်လည်း သန်းခေါင်းယံ အချိန်ကို ကျော်လွန်လာခဲ့လေပြီ ဖြစ်၏။ ထိုအချိန် ထိုကာလမျိုးတွင် ဥစ္စာစောင့်များ ရှိသည်ဟူ၍ နာမည်ကြီးသော ရန်အောင်တောင်ဆီသို့ လာရောက်ရန်မှာ လူတစ်ရာတွင် တစ်ယောက်ပင် လုပ်ဆောင်မည့် အလုပ်ဟူ၍ မထင်မိပါပေ။ သိုရာတွင်မူ ရွက်လှရွာမှ လူရွယ်တစ်စုမှာမူ ယခုကဲ့သို့သော အချိန်အခါမျိုးတွင် တောင်ဆီသို့ လာရောက်ခြင်းထက် တောင်ပေါ်သို့ပင် တက်ရောက်နေကြပြီ ဖြစ်လေ၏။

၎င်းလူရွယ်တစ်စုသည် ပုံသဏ္ဍာန်အားဖြင့် ထောင်လိုက် ပုံစံမျိုးဖြင့် တောင်ပေါ်သို့ တက်ရောက်နေကြလေ၏။ ဆိုလိုသည်မှာ တစ်ယောက်နောက်မှ တစ်ယောက် တက်ရောက်ကြခြင်းပင် ဖြစ်ပါ၏။ အထက်တွင် ဆိုခဲ့သည့်အတိုင်း ရဲကြီးဆိုသူ လူရွယ်မှာ ရှေ့မှ ဦးဆောင်၍ တက်ရောက်နေ၏။ ၎င်း၏ လက်ထဲတွင် သစ်သားချောင်းအား ကျစ်ကျစ်ပါအောင် ဆုပ်ကိုင်ထားသကဲ့သို့ မှောင်မိုက်နေသည့် ပတ်ဝန်းကျင်အားလည်း သတိထား ကြည့်ရှုကာဖြင့် တောင်ပေါ်ဆီသို့ တက်ရောက်နေလေသည်။

ယင်းသို့ တက်ရောက်လာကြရာတွင် တောင်ပေါ်ဆီသို့ ရောက်လုနီးအချိန်တွင် ရဲကြီးဆိုသူမှာ ရှေ့သို့ ဆက်လက် တက်ရောက်ခြင်း မပြုသေးဘဲ ရပ်လိုက်လေ၏။ ၎င်း၏ နောက်မှ လူရွယ်များကိုလည်း ငြိမ်နေကြရန် ဟန်အမူအယာပြ၍ သတိပေးလိုက်သည်ကို တွေ့ရလေသည်။ ယင်းသို့သော သတိထား၍ သွားလာရသည့် အချိန်မျိုးတွင် စကားပြောခြင်း မပြုကြရန်၊ အတတ်နိုင်ဆုံး အသံမထွက်စေရန် တောင်အောက် ကတည်းကပင် ကြိုတင် တိုင်ပင်ထားခဲ့ကြပြီး ဖြစ်သောကြောင့် ရဲကြီး ဆိုသူ လူရွယ်မှ ဟန်အမူအယာဖြင့် သတိပေးလိုက်ခြင်းပင် ဖြစ်လေ၏။

ရဲကြီးဆိုသူ လူရွယ်မှာ ၎င်းနောက်မှ လူရွယ်များအား ထပ်မံ၍ လက်နှစ်ချောင်း ထောင်ပြကာ ရှေ့ဆီသို့လည်း လက်ညိုးညွှန်ပြလိုက်လေသည်။ နောက်ဆုံးမှ လိုက်ပါလာရသူ ဖိုးလေး ဆိုသူ လူရွယ်မှာ ရဲကြီးပြသည့် ဟန်အမူအယာများအား ရှင်းလင်းစွာ မမြင်ရပေ။ သို့ရာတွင် ၎င်း၏ ရှေ့မှ လူရွယ်မှ ပြန်လည် ပြသလိုက်ခြင်းကြောင့် ကောင်းစွာ သိရှိသွားရလေ၏။

ထိုသို့ဖြင့် ၎င်းတို့သည် ရဲကြီး ဆိုသူ လူရွယ်၏ အရိပ်အယောင်အား ကြည့်၍ စောင့်ဆိုင်းနေကြစဉ်တွင် …

“အမလေးဗျ ….”

ဟူသော အော်သံကြီးသည် ညသန်းခေါင်းယံ အချိန်ကို ထွင်းဖောက်၍ ကျယ်လောင်စွာ ထွက်ပေါ်လာသည်ကို ကြားလိုက်ရလေ၏။

“ဟေ့ … ဘယ်သူလဲကွ၊ သေချင်လို့လား …”

အဆိုပါ အသံမှာ တောင်ပေါ်ရှိ ရန်အောင်တောင် နံဘေးမှ အသံဖြစ်လေ၏။ ယင်းသို့ တောင်ပေါ်ဆီမှ အသံပေး၍ စိန်ခေါ်လိုက်သော်လည်း လူရွယ်အုပ်စုမှာ တုပ်တုပ်မျှပင် မလှုပ်ကြပေ။ ထိုအခါ တောင်ပေါ်ဆီမှ နေ၍ လူရွယ်အုပ်စု ရှိရာဆီသို့ လှမ်းလျောက်၍ လာသည့် အသံများကို ကြားလိုက်ရလေသည်။

အဆိုပါ ခြေသံမှာ ၎င်းတို့နှင့် အတန်ငယ် နီးကပ်လာသော အခါတွင် ရဲကြီး ဆိုသူမှာ မတ်တပ်ထ၍ ရပ်လိုက်လေ၏။ ၎င်းနောက်မှ လူရွယ်များမှာလည်း ရဲကြီး ကဲ့သို့ပင် ရပ်လိုက်ကြသည်ကို တွေ့ရလေ၏။ ပြီးနောက် ၎င်းတို့သည် ၎င်းတို့ထံ လျောက်လှမ်းလာသော ခြေသံပိုင်ရှင်ဆီသို့ လျောက်လှမ်းသွားကြလေ၏။

“ကျုပ်တို့ ရွက်လှ ရွာသားတွေပဲ။ ခင်ဗျားတို့ကရော ဘာတွေလဲ”

ရဲကြီး ဆိုသူ လူရွယ်မှ ၎င်းတို့နှင့် ခပ်လှမ်းလှမ်းတွင် ရှိနေသော မျက်နှာများအား ပဝါစများဖြင့် စည်းနှောင်ထားသည့် လူနှစ်ယောက်အား ပြောလိုက်ခြင်းပင် ဖြစ်လေ၏။ ထိုအခါ မျက်နှာအား ပဝါစည်းထားသည့် လူတစ်ဦးမှ ရီကျဲကျဲ လေသံဖြင့် ပြန်လည် ပြောဆိုလေ၏။

“ဟ .. တယ်လာတဲ့ လူငယ်ပါလားဟေ့။ ငါတို့ ဘာဖြစ်ဖြစ်ပေါ့ကွာ။ မင်းတို့က အချိန်မတော် ဘာကြောင့် ဒီတောင်ပေါ်ကို ရောက်လာတာလဲ။ သရဲ မကြောက်ဘူးလား”

“ကျုပ်က သရဲကို လူဆိုးလူညစ်လောက် မကြောက်တတ်ဘူးဗျ”

“သတ္တိခဲလေးတွေပါလား ဖိုးကျော်ရေ”

“ဟုတ်ပါသကော ကိုခင်ရေ။ ဒီသတ္တိခဲလေးတွေကို နည်းနည်းလေး ကြောက်တတ်သွားအောင် သင်ပေးရရင် မကောင်းဘူးလားဗျ”

“အင်း .. ငါလည်း ဒါကိုပဲ စဉ်းစားနေတာ … ငါတို့တော့ တယောထိုးတဲ့ သရဲကို မဖမ်းနိုင်သေးတဲ့ အတူတူ ဒီကောင်လေးတွေကိုပဲ ဖမ်းလိုက်ကြရင် မကောင်းဘူး”

ထိုအခါ ရဲကြီးဆိုသူ လူရွယ်မှာ ၎င်း၏ လက်အတွင်းမှ သစ်သားချောင်းအား ကိုင်ဆုပ်၍ ပြသရင်း …

“ဟေ့လူတွေ ခင်ဗျားတို့ ဒါကို ဘာမှတ်နေတုန်း”

ဟူ၍ အသံအား အနည်းငယ်မြှင့်ကာ ပြောလိုက်လေ၏။

“အဲဒါ သစ်သားချောင်းကြီးလေကွာ၊ ငါတို့မှာ မင်းတို့ လက်ထဲက သစ်သားချောင်းတွေထက် ကောင်းတဲ့ဟာ ပါသကွ၊ ဟောဒီမှာ လေကွာ”

ဟူ၍ ဖိုးကျော် ဆိုသူမှာ ၎င်း၏ ခါးကြားတွင် ထိုးထားသည့် သေနတ်အား ထုတ်ယူကာ ပွတ်သပ်၍ ပြောလိုက်လေ၏။ လူရွယ်တစ်စုမှာ အဆိုပါ သေနတ်အား မြင်လိုက်ရသော အခါတွင် တန့်သွားကြလေတော့၏။

+++++++++++++++++++++

ယင်းသို့ ဖိုးကျော် ဆိုသူ မျက်နှာအား ပဝါစ စည်းနှောင်ထားသူမှ ၎င်း၏ ခါးကြားအတွင်းမှ သေနတ်အား ထုတ်ယူကာ လူရွယ်တစ်စုအား ခြိမ်းခြောက်စကား ပြောကြားလိုက်စဉ်တွင် ၎င်း၏ ကျောဘက်မှ အသံတစ်သံသည် ထွက်ပေါ်လာလေတော့၏။ ထိုအသံမှာ လူရွယ်တစ်စုနှင့် မျက်နှာပဝါစ စည်းနှောင်ထားသူ လူနှစ်ဦးတို့၏ လာရင်းကိစ္စဖြစ်သော တယောသံ ပင် ဖြစ်လေတော့၏။

အဆိုပါ တယောသံမှာ လွမ်းဆွေးဖွယ် ကောင်းလှ၏။ ဂီတနှင့် မယဉ်ပါးသူများပင် ထိုတယောသံအား ကြားရသည့် အခိုက်တွင် ငြိမ်သက်ကာ နားဆင် နေကြမည်ဟု ထင်မိလေ၏။ ယခု ကဲ့သို့သော တိတ်ဆိတ်သော ညသန်းခေါင်ယံ အချိန်မျိုးတွင် ကြယ်ရောင်များ ထွန်းလင်းနေသော လွတ်လပ် ကျယ်ပြောသည့် ကောင်းကင်ပြင်ကြီး၏ အောက်တွင် အဆိုပါ တယောသံအား နားဆင်ရသည်မှာ အလုံပိတ် ပြဇာတ်ရုံအတွင်း နားဆင်ရသည်ထက် ပို၍ အနှစ်သာရ ပြည့်ဝပေလိမ့်မည် ဟူ၍လည်း ထင်မြင်မိလေ၏။

ရွက်လှရွာသား လူရွယ်တစ်စုနှင့် မျက်နှာစည်းနှောင်ထားသူ လူနှစ်ဦးတို့သည် တယောသံ ထွက်ပေါ်လာသောအခါတွင် ၎င်းတို့ အချင်းချင်း ပြောဆိုနေကြသည့် ရန်လိုသော စကားများအား ခေတ္တ ရပ်နားလိုက်ကြလေ၏။ ထို့နောက်တွင် ကိုခင် ဆိုသူမှ ဖိုးကျော် ဆိုသူအား တီးတိုး ပြောဆိုလေ၏။

“ဒီကောင်တွေကို သေနတ်နဲ့ မင်း ချိန်ထားလိုက်ဦး၊ ငါ တယောထိုးတဲ့လူကို သွားကြည့်လိုက်မယ်။”

ထိုအခါ ဖိုးကျော် ဆိုသူမှ ၎င်း၏ ဦးခေါင်းအား အသာဆတ်ပြလိုက်ပြီးနောက် ၎င်း၏ လက်အတွင်းမှ သေနတ်ဖြင့် လူရွယ်တစ်စုအား ချိန်ထားလိုက်လေ၏။ ကိုခင် ဆိုသူမှာလည်း ၎င်းတို့၏ ကျောဘက်၊ ရန်အောင် စေတီလေး၏ အရှေ့တောင် ခပ်ယွန်းယွန်းမှ ပေါ်ထွက်လာနေသည့် တယောသံ ကြားရာ အရပ်ဆီသို့ လျှောက်လှမ်းသွားလေတော့၏။

++++++++++++++++

“ဟေ့လူ … ခင်ဗျား လက်ထဲက သေနတ်က အတုလား၊ အစစ်လား”

မိုးကို ဆိုသူ ရွယ်မှ ၎င်းတို့အား သေနတ်ဖြင့် ချိန်ထားသူ ဖိုးကျော် ဆိုသူအား မေးလိုက်ခြင်းပင် ဖြစ်၏။ ထိုအခါ ဖိုးကျော် ဆိုသူမှ …

“အစစ်မှန်း အတုမှန်း သိချင်ရင် မင်းကို အစမ်း ပစ်ပြမယ်လေ၊ မကောင်းဘူးလား၊ ဟား .. ဟား ”

ဟူ၍ ပြောဆိုလိုက်သည်ကို တွေ့ရလေ၏။

“အစမ်းတော့ မပစ်ပြပါနဲ့ဗျာ၊ သေနတ်နဲ့ ပစ်ခံရလို့ သေတဲ့လူဆိုပြီး ရွာထဲမှာ နာမည်ကြီးသွားပါဦးမယ်ဗျ၊ မဟုတ်ဘူးလား ဟေ့ကောင်တို့ရာ”

“အေး .. ဟုတ်တယ် မိုကိုရေ၊ နာမည် ကြီးမယ်ဆိုလည် မင်းတစ်ယောက်တည်း အကြီး မခံနိုင်ပါဘူး။ ငါတို့ပါ ပါမှာပေါ့ကွ”

ယင်းသို့ လူရွယ်တစ်စုမှ ၎င်းတို့ အချင်းချင်း ပြောဆိုလျက် ရှိနေကြစဉ်တွင် ဖိုးကျော် ဆိုသူမှ ပြောလေ၏။

“ဟေ့ကောင်တွေ၊ ယီးတီးယားတား တော့ လုပ်မယ် မကြံကြနဲ့နော့။ ငါ့ လက်ညိုးလေး တစ်ခါကွေးလိုက်ရင် အသက် တစ်ချောင်း ပါတတ်တယ်။ လွယ်လွယ်နဲ့တော့ ပါသွားတယ် မထင်နဲ့ဦး။ မချိမဆန့် ဝေဒနာတွေကို ခံစားရသေးတယ်ဆိုတာလည်း မှတ်ထားဦး .. ဟဲ .. ဟဲ”

“ဒီလိုဆို ခင်ဗျားကို မေးရပါဦးမယ် … ဒီဝေဒနာတွေက မြွေကိုက်ခံရတဲ့ ဝေဒနာတွေလောက် ပြင်းသလားဗျ”

ရဲကြီး ဆိုသူ လူရွယ်မှ ယင်းသို့ မေးလိုက်သော အခါတွင် ..

“ငါ့ကို အဲဒါတွေ လာမမေးနဲ့။ သိချင်ရင် ပစ်ပြမယ်”

ဟူ၍ ပြောဆိုကာ ၎င်း၏ သေနတ် ပြောင်းဝအား ရဲကြီး ဆိုသူ ဘက်သို့ ချိန်ထားလိုက်သည်ကို တွေ့ရလေ၏။ ထိုအခါ ရဲကြီး ဆိုသူ လူရွယ်မှာ ၎င်း၏ လက်အတွင်းမှ သစ်သားချောင်းအား အောက်သို့ ချလိုက်လေ၏။ ပြီးနောက် လက်နှစ်ဖက်အား မြှောက်လိုက်ကာ ..

“ပစ်တော့ မပြပါနဲ့ဗျာ။ ကြောက်ပါတယ်ဗျ။ ကျုပ်က အဲဒီ ဝေဒနာမျိုးကို မခံစားဖူးချင်ပါဘူး။ အဲ … ဒါပေမယ့် .. ဒါပေမယ့်”

ဟူ၍ ၎င်း၏ စကားအား မဆက်သေးဘဲ မျက်နှာစည်းထားသူ ဖိုးကျော် ဆိုသူ၏ နောက်သို့ ကြည့်လိုက်ကာ ..

“ခင်ဗျားတော့ဖြင့် မြွေကိုက်ခံရတဲ့ ဝေဒနာကို ခံစားရတော့မယ် ထင်တယ်။ ခင်ဗျားရဲ့ နောက်မှာ မြွေဟောက်ကြီး …”

ဟူ၍ ပြောလိုက်လေရာ ဖိုးကျော် ဆိုသူမှာ အတန်ငယ် လန့်သွားပြီးနောက် ၎င်း၏ နောက်သို့ ဆတ်ခနဲ လှည့်ကြည့်လိုက်လေတော့၏။ ထိုအခိုက်တွင် မိုးကို ဆိုသူ လူရွယ်မှာ ၎င်း၏ လက်အတွင်း ကိုင်ဆောင်ထားသော သစ်သားချောင်းဖြင့် ဖိုးကျော် ဆိုသူ၏ သေနတ်ကိုင်ထားသော လက်ဆီသို့ ပစ်ပေါက်လိုက်လေ၏။

“ဒုတ် ……… ခွပ် …….. အ ….”

အဖြစ်အပျက်မှာ မြန်ဆန်လှ၏။ သစ်သားချောင်းမှာ ဖိုးကျော် ဆိုသူ၏ လက်ကောက်ဝတ်အား ထိမှန်ကာ သေနတ် မှာလည်း မြေသို့ ပြုတ်ကျသွားလေ၏။ ထိုအချိန်နှင့် အံကိုက်ပင် လက်ကို မြှောက်ထားသော ရဲကြီးမှ ဖိုးကျော် ဆိုသူထံ ပြေးသွားကာ ၎င်း၏ ခြေထောက်ဖြင့် မြေပေါ်မှ သေနတ်အား ဖိနင်းရင်း ဖိုးကျော် ဆိုသူ၏ မျက်နှာအား ၎င်း၏ ခေါင်းဖြင့် တိုက်ချလိုက်လေ၏။ ကျန်လူရွယ် လေးယောက်မှာလည်း ရဲကြီးနှင့် မရှေးမနှောင်းပင် ရောက်လာပြီးနောက် ဖိုးကျော် ဆိုသူအား ချုပ်ထားလိုက်လေတော့၏။

“ဟေ့ကောင် .. သူ့ မျက်နှာဖုံး ဆွဲချွတ်လိုက်ကွာ။ ဘယ်သူလဲ သိရအောင်”

ယင်းသို့ ရဲကြီး ဆိုသူမှ ပြောလိုက်သော အခါ ငအောင် မှ ဖိုးကျော် ဆိုသူ၏ မျက်နှာတွင် စည်းနှောင်ထားသော ပဝါစ အား ဖြတ်ခနဲ ဆွဲယူကာ ဖြုတ်ချလိုက်လေ၏။ ထိုအခါ လူရွယ်များမှာ ဖိုးကျော် ဆိုသူ၏ မျက်နှာအား အသေအချာ ကြည့်ရှုလိုက်ပြီးနောက် …

“ဟာ … ဒါ .. ငါတို့ရွာကို လာလာတောင်းနေတဲ့ သူတောင်းစား မဟုတ်လားကွ။ တော်တော် ရိုင်းတာပဲကွာ”

ဟူ၍ အချင်းချင်း ပြောဆိုကြလေ၏။ ထိုအခိုက်တွင် …

“ဟုတ်ပါတယ်ကွာ။ မင်းတို့ရွာထဲဝင်ပြီး တောင်းစားနေတဲ့ သူတောင်းစားပါပဲ။ ဒါပေမယ့် သူတောင်းစား အစစ်တော့ မဟုတ်ဘူး။ တကယ်က ဓားပြကွယ့်”

ဟူသော အသံတစ်သံသည် လူရွယ်တစ်စုနှင့် ခပ်လှမ်းလှမ်းဆီမှ ထွက်ပေါ်လာလေ၏။ လူရွယ်များမှာ အဆိုပါ အသံပိုင်ရှင်အား အထူးအဆန်း သဖွယ် ကြည့်ရှုလိုက်လေ၏။ တစ်ယောက်သော သူရွယ်မှ ထိုအသံပိုင်အား ရိုးရိုး မြင်ရရုံဖြင့် အားမရသည့်ဟန်ဖြင့် ဓါတ်မီးအလင်းဖြင့် ကြည့်ရှုလိုက်သည်ကိုလည်း တွေ့ရလေ၏။

“ခင်ဗျားက ဘယ်သူတုံး။ ခင်ဗျားကို ကျုပ်တို့လည်း မမြင်ဖူးပါလားဗျ”

“ငါ့ နာမည် ဗြဟ္မာမောင်မောင် လို့ ခေါ်တယ်။ ဒီလို ကောင်မျိုးတွေကို ကန့်လန့် တိုက်တတ်တဲ့ လူတစ်ယောက်ပဲ ဆိုပါတော့ကွာ”

“နေစမ်းပါဦးဗျ။ ခင်ဗျားက စုံထောက်လား”

“မင်းတို့ ထင်သလို ထင်လိုက်ကြပေါ့ကွာ။ ဒါနဲ့ တောင်အောက်မှာ မင်းတို့ သူကြီးရယ်၊ ဘသာအောင်ရယ်၊ ရွာသားတွေရယ် စောင့်နေကြလိမ့်မယ်။ မင်းတို့ သူ့ကို ထမ်းခေါ်ပြီး သွားလိုက်ကြ။ ငါလည်း တစ်ယောက်ကို သယ်ခဲ့ရဦးမယ်”

ဟူ၍ ပြောဆိုပြီးနောက် ဗြဟ္မာမောင်မောင် ဆိုသူမှာ ထွက်ခွာသွားလေ၏။ လူရွယ်တစ်စုမှာလည်း ၎င်းတို့ ဖမ်းမိထားသော ဖိုးကျော် ဆိုသူအား ဆွဲခေါ်ကာ တောင်အောက်သို့ ဆင်းသွားကြလေတော့၏။ ရန်အောင်တောင် အောက်သို့ ရောက်သောအခါတွင် ရွက်လှ ရွာသူကြီး၊ အဖိုးကြီး ဦးသာအောင်နှင့်အတူ ရွာသား ဆယ်ယောက်ခန့်ကို တွေ့ရလေ၏။ ထို့ထက် အခြားသော လူသုံးဦးကိုလည်း တွေ့ရလေ၏။

လူရွယ်တစ်စုသည် ၎င်းတို့ ဆွဲခေါ်လာသော ဓါးပြဆိုသူ ဖိုးကျော် အား သူကြီးတို့၏ လက်အတွင်းသို့ အပ်လိုက်ကြလေ၏။ လူရွယ်တစ်စုနှင့် မရှေးမနှောင်းမှာပင် ဗြဟ္မာမောင်မောင် ဆိုသူမှာလည်း ရောက်ရှိလာပြီးလျှင် ၎င်း၏ ပုခုံးထက် ထမ်းလာသော သတိမေ့နေသည့် လူတစ်ဦးအား သူကြီး၏ ရှေ့သို့ ဝုန်းခနဲ ပစ်ချပေးလိုက်လေ၏။ ယင်းနောက် ဗြဟ္မာမောင်မောင် ဆိုသူမှ ဤသို့ ပြောလေသည်။

“ကဲ .. သူကြီး၊ ဒီငါးယောက်ကို ပုလိပ်လက်ကို သွားအပ်လိုက်ကြပါ။ ပုလိပ်က ဘယ်သူတွေလဲလို့ မေးခဲ့ရင် “ကြောင်နက် အုပ်စုပဲ” လို့ အဖြေပေးလိုက်ပါ။ ကျုပ် တာဝန် တစ်ခုတော့ဖြင့် ပြီးသွားပြီ။”

ယင်းသို့ ပြောလိုက်သောအခါ လူရွယ်တို့မှ မေးမြန်းကြလေ၏။

“ဒါနဲ့ တစ်ခုလောက် မေးချင်လို့ပါ။ တောင်ပေါ်မှာ တယောထိုးတာက ခင်ဗျားလားဗျ”

“ဟုတ်ပါတယ် ငါ့ညီတို့ရဲ့။ ဘာလဲ ..။ မင်းတို့က ဥစ္စာစောင့်တို့၊ သရဲတို့ ဆိုတာတွေ ထင်နေလို့လား”

“အဟဲ … ဟုတ်တယ်ဗျ။ ဒါကြောင့် ဒီနေ့ည လာချောင်းကြည့်တာပါ”

“ဒီတယောသံရဲ့ ရည်ရွယ်ချက်က ငါ့ညီတို့ အတွက် မဟုတ်ဘူးကွ။ ဟောဒီက ကြောင်နက် အုပ်စု အတွက်ပဲ။ ဒီကောင်တွေက ရွာတွေကို လိုက်ပြီး ဓါးပြတိုက်နေတဲ့ ကောင်တွေ။ ဓါးပြ ဆိုပေမယ့် ပေါ့သေးသေး ဓါးပြတွေတော့ မဟုတ်ဘူး။ ဟိုက မေ့နေတဲ့ လူဆိုရင် အတော် နပ်တဲ့လူပဲကွ”

ယင်းတို့ဖြင့် သူကြီးနှင့် ရွာသားများမှာ “ကြောင်နက်အုပ်စု” ဓါးပြများအား ပုလိပ်လက်သို့ အပ်နှံရန် ထွက်ခွာသွားကြလေ၏။ သူကြီး၏ မှာကြားချက်အရ လူရွယ်တစ်စုသည်လည်း ရွာဆီသို့ ပြန်သွားကြလေ၏။  အဖိုးကြီး ဦးသာအောင်နှင့် ဗြဟ္မာမောင်မောင် ဆိုသူတို့မှာ ဦးသာအောင်၏ တဲကလေးဆီသို့ လျှောက်လှမ်းသွားကြလေ၏။

“မောင်ရင်ရဲ့ အကြံအစည်တွေကတော့ အံ့မခန်းပါပဲ။ ကွက်တိကို ဖြစ်နေတော့တာပါပဲလားကွယ့်”

“အဲဒီလောက်လည်း မဟုတ်သေးပါဘူး ဘသာအောင်ရယ်။ ကျုပ်က ဖြစ်နိုင်ချေ ရှိတာတွေကို တွေးပြီး လှုပ်ရှားရတာပါ”

“ဒါနဲ့ မောင်ရင်ကို မေးရပါဦးမယ်။ မနက်ဖြန် ညကျရင်ရော တောင်ပေါ်တက်ပြီး တယောထိုးဦးမှာလား”

“တောင်ပေါ် တက်စရာ မလိုတော့ပါဘူး ခင်ဗျာ။ တယော ထိုးမယ့်ထိုးတော့ ဘသာအောင်ရဲ့ တဲကလေး အရှေ့ ကွပ်ပျစ်လေးပေါ်မှာပဲ အေးအေးလူလူ ထိုးတော့မယ်ပေါ့ဗျာ .. အဲဒါဆို ဘသာအောင်လည်း နီးနီးကပ်ကပ် နားထောင်လို့ ရတာပေါ့”

“ဟာ .. ဟုတ်တယ်။ အဲဒါ ပိုကောင်းတယ်။ ဟား .. ဟား … ဟား …”

အဖိုးကြီး ဦးသာအောင်မှ ယင်းသို့ ဗြဟ္မာမောင်မောင်၏ စကားအား သဘောကျစွာ ရီမောလိုက်သကဲ့သို့ ဗြဟ္မာမောင်မောင်မှာလည်း အဖိုးကြီး ဦးသာအောင်အား ကြည့်ကာဖြင့် ၎င်း၏ မျက်နှာတွင် ပြုံးယောင်သန်းလာသည်ကို ညခင်း ကြယ်အလင်းဖြင့် ခပ်ရေးရေး မြင်တွေ့လိုက်ရလေတော့သတည်း ……..။

=======================

By - မဟာရာဇာ အံစာတုံး
================
2:55 AM

ကျွန်ုပ်နှင့် ရွှေဥ ဥသော ငှက်အကြောင်း

Posted by Sayar Ann
တစ်နေ့သ၌ ကျွန်ုပ် မောင်မင်း သည် ဆူညံလွန်းခြင်း၊ တိတ်ဆိတ်လွန်းခြင်း စသည့် အစွန်းနှစ်ပါး လွတ်ပြီး အတန်အသင့် လူသွားလူလာ ရှိသော လမ်းကလေး နံဘေး၌ ဖွင့်လှစ်ထားသည့် လက်ဖက်ရည်ဆိုင်ကလေး၌ ထိုင်ရင်း လက်ဖက်ရည် တစ်ခွက်အား ဇိမ်ခံ၍ သောက်နေလေ၏။ လက်ဖက်ရည် တစ်ဝက်ခန့် ကုန်သွားသောအခါ အသင့် ဆောင်ထားသော စီးကရက်ဘူးအတွင်းမှ စီးကရက်တစ်လိပ်အား ထုတ်ယူ၍ မီးညှိ ရှိုက်ဖွာကာ ဟိုတွေး ဒီငေးဖြင့် အားလပ်ခြင်း အရသာအား အပြည့်အဝ ယူနေမိလေတော့၏။

ထိုအခိုက်တွင် အသက်အားဖြင့် (၄၀) ဝန်းကျင်ခန့်ရှိသည့် မှုတ်ဆိတ်မွှေးများ ထူထပ်စွာ ပေါက်ရောက်လျက်ရှိသော လူကြီး တစ်ဦးသည် ကျွန်ုပ်ထိုင်လျက် ရှိသည့် လက်ဖက်ရည် ဆိုင်လေး အတွင်းသို့ ဝင်ရောက်လာခဲ့လေ၏။ ထိုလူကြီးသည် ဆိုင်အတွင်းသို့ အကဲခတ် ကြည့်ရှုလိုက်ပြီးနောက် ကျွန်ုပ် ထိုင်လျက် ရှိသော စားပွဲသို့ လာရောက် ထိုင်လေ၏။

ထိုအခါ ကျွန်ုပ်မှာ လူကြီးအား တစ်ချက် ကြည့်လိုက်ပြီးနောက် ဆိုင်အတွင်းမှ စားပွဲဝိုင်းများကိုလည်း လှည့်ပတ်ကြည့်ရှုမိလေ၏။ အဘယ်ကြောင့်ဆိုသော အခြားဝိုင်းများမှာ ထိုင်သူများ ရှိနေသည့် အတွက် မအားလပ်သောကြောင့် ထိုလူကြီး ကျွန်ုပ် စားပွဲသို့ လာရောက် ထိုင်ခြင်း ပေလော ဟူ၍ စူးစမ်းလိုသဖြင့် ကြည့်ရှုမိခြင်း ဖြစ်ပေသည်။ ယင်းသို့ ကျွန်ုပ် ကြည့်ရှုလိုက်သောအခါ အားလပ်လျက် ရှိသော စားပွဲဝိုင်း (၃) ဝိုင်းခန့် ရှိနေသည်ကို တွေ့လိုက်ရသည့်အတွက် ကျွန်ုပ်မှာ အတန်ငယ် ဒေါပွမိသွား၏။



ကျွန်ုပ်မှာ တစ်ယောက်တည်း အေးအေးလူလူ ထိုင်၍ ဇိမ်ခံနေခြင်းအား လာရောက်ကာ အနှောက်အယှက် ပေးနေသော လူကြီးအား မျက်စောင်းထိုးကာ ကြည့်လိုက်ပြီးနောက် ကျွန်ုပ်၏ သောက်လက်စ လက်ဖက်ရည်ခွက်အား ကိုင်ကာ အခြားဝိုင်းသို့ ပြောင်းရွှေ့ထိုင်ရန် ဟန်ပြင်လိုက်၏။ ထိုအခိုက်တွင် မှုတ်ဆိတ်မွေးများနှင့် ထိုလူကြီးမှ —


“မောင်ရင်၊ ကျုပ်လာထိုင်လို့ အနှောက်အယှက် ဖြစ်သွားသလား၊ ကျုပ်က မောင်ရင့်ကို ပြောစရာလေး ရှိလို့ တမင်တကာ မောင်ရင့်ဝိုင်းမှာ လာထိုင်တာပါ၊ ဝိုင်း မပြောင်းပါနဲ့ဦး၊ ဒီမှာပဲ ခဏဖြစ်ဖြစ် ထိုင်ပြီး ကျုပ်ပြောတာလေးကို နားထောင်ပေးပါဦး”

ဟု ဆိုလေရာ ကျွန်ုပ်မှာ တစ်ချက် တွေဝေသွားရလေ၏။ ကျွန်ုပ်မှာ ထိုလူကြီးအား မသိကျွမ်းပေ။ ထိုလူကြီးမှမူ ကျွန်ုပ်အား သိကျွမ်းသကဲ့သို့ စကားစနေသဖြင့် ကျွန်ုပ်၏ စိတ်အတွင်း၌ သို့လောသို့လော ဖြစ်သွားရခြင်း ဖြစ်လေ၏။ သို့ဖြင့် ကျွန်ုပ်လည်း အခြားဝိုင်းသို့ ပြောင်းရွှေ့ခြင်း မပြုတော့ဘဲ ထိုင်မြဲ နေရာ၌ပင် ပြန်လည် ထိုင်လိုက်လေတော့၏။

“ခင်ဗျား၊ ကျုပ်ကို ပြောမှာဆိုတာ ဘာတုန်း၊ ခင်ဗျားကိုလည်း ကျုပ် မသိပါလား”

“မောင်ရင်က ကျုပ်ကို မသိပေမယ့် ကျုပ်ကတော့ မောင်ရင့်ကို သိနေတဲ့ လူတစ်ယောက်ပဲ ဆိုပါတော့၊ ဒါကို ထားပါဦး၊ ကျုပ်ပြောချင်တဲ့ အကြောင်းက တကယ့်ကို ထူးခြားဆန်းပြားတဲ့ အကြောင်းပဲ မောင်ရင်ရဲ့”

ယင်းသို့ လူကြီးမှ ပြောလိုက်သော အခါ ကျွန်ုပ်မှာ သူ၏ ထူးခြား ဆန်းပြားသည့် အကြောင်းကို မြန်မြန်ပြီး ပြီးတာပဲ ဟူသော သဘောဖြင့် စိတ်ဝင်စားသွားဟန် ပြကာ မြန်မြန် ပြောဆိုရန် တိုက်တွန်းမိလေ၏။

“ဒီလို မောင်ရင်ရဲ့၊ ငန်း က ရွှေဥ ဥပေးတယ်ဆိုတဲ့ အကြောင်းကို ကြားဖူးသလား”

“ကြားဖူးတယ်လေ၊ ငန်းက တစ်နေ့ကို ရွှေဥ တစ်လုံး ဥပေးတယ်၊ လောဘကြီးတဲ့ ငန်းပိုင်ရှင်က ငန်းဗိုက်ထဲမှာ ရွှေဥတွေ အများကြီး ရှိဦးမှာပဲ ဆိုပြီး ငန်းကို သတ်ပြီး ဗိုက်ခွဲကြည့်တယ်၊ ဒီဇာတ်လမ်း မဟုတ်လား”

“ဟုတ်တယ် မောင်ရင်၊ အဲ့ဒီ အကြောင်းပဲ၊ ဒါ့ထက် မောင်ရင့်ကို မေးရဦးမယ်”

“မေးဗျာ”

ယင်းသို့ ကျွန်ုပ်မှ ပြောလိုက်တော့အခါ လူကြီးမှ ကျွန်ုပ်အား သေချာစွာ စိုက်ကြည့်၍ မေးလိုက်လေ၏။

“အဲ့ဒီလိုမျိုး ရွှေဥ ဥပေးတဲ့ ငှက်မျိုး အပြင်မှာ တစ်ကယ်ရှိတယ်ဆိုရင် မောင်ရင် ယုံမလား”

ထိုအခါ ကျွန်ုပ်မှာ ရီချင်သွားမိလေ၏။ အဘယ်ကြောင့် ဆိုသော် ထိုလူကြီးမှာ စာရေးဆရာတို့၏ စိတ်ကူးဖြင့် ဇာတ်လမ်းဆင် ရေးသားထားသည့် စာများအား ဖတ်ရှုပြီး တကယ် အဟုတ်ရှိသည်ဟု မှတ်ထင်နေသည့် ငပေါကြီး တစ်ယောက်ပါတကား ဟူ၍ ကျွန်ုပ်၏ စိတ်တွင်းမှ မှတ်ထင်၍ ရီချင်မိခြင်း ဖြစ်လေ၏။

လူကြီးမှာ ကျွန်ုပ်၏ ဟန်အမူအယာအား ကြည့်လိုက်ပြီးနောက် ပြောလေ၏။

“မောင်ရင်ကတော့ ကျုပ်ကို ငပေါကြီးလို့ ထင်နေလိမ့်မယ်။ ကျုပ် မပေါ ပါဘူးဗျာ။ ကျုပ်က တကယ် မေးတာပါ”

ထိုအခါ ကျွန်ုပ်မှ ရီကျဲကျဲ အမူအယာဖြင့် “မယုံဘူးဗျာ” ဟူ၍ ဖြေဆိုလိုက်ရ၏။

“လက်တွေ့ ပြမယ်ဆိုရင်ရော မောင်ရင် ယုံမလား”

“အင်း …၊ ဒါဆိုရင်တော့ ယုံရမှာပေါ့ဗျာ”

ယင်းသို့ ကျွန်ုပ်မှ ပြောလိုက်သောအခါ လူကြီးမှာ ၎င်း၏ လွယ်အိတ်ကြီးအတွင်း တစ်စုံတစ်ရာအား ထုတ်ယူ၍ အခြားသော လူများ မမြင်စေရန်အတွက် ၎င်း၏ လက်ခုပ်အတွင်းတွင် ထိုအရာများ ထားကာ ကျွန်ုပ်၏ မျက်နှာအနီးသို့ ကပ်၍ ပြလေ၏။ ထိုအရာမှာ လွန်စွာ အရည်အသွေးကောင်းသော ကြက်ဥ ပုံသဏ္ဍာန် ရွှေအလုံးပင် ဖြစ်လေ၏။

ကျွန်ုပ်မှာ ၎င်း၏ လက်ခုပ်အတွင်းမှ ထိုရွှေဥ အား ကြည့်ရှုလိုက်ပြီးနောက် တွေးမိသည်မှာ ထိုရွှေဥအား ရွှေဆိုင်များ၌ ပြုလုပ်၍ ရနိုင်ကြောင်း တွေးမိသော်လည်း လူကြီးနှင့် စကားစ အမြန် ပြတ်လိုသည့်အတွက် “ယုံပါပြီဗျာ” ဟူ၍ပင် အလွယ်တကူ အဖြေပေးလိုက်၏။ ထိုအခါ လူကြီးမှာ သဘောကျသွားဟန်ဖြင့် ပြုံးလိုက်သည်ကို တွေ့ရလေ၏။

“မောင်ရင့်ကို ကျုပ်ပြောချင်တာ ဒီအကြောင်းပဲ မောင်ရင်ရဲ့”

ယင်းသို့ လူကြီးမှ ပြောလိုက်သော အခါတွင် ကျွန်ုပ် စိတ်တွင်း၌ ထိုလူကြီးကား အရပ်တကာ လှည့်လည်၍ ၎င်း၏ ရွှေဥ အား လိုက်လံ ပြသကာ ကြွားဝါနေသော လူကြီး တစ်ယောက် ဖြစ်ပေလိမ့်မည်ဟု တွေးထင်မိသကဲ့သို့ လူဆိုးလူမိုက်များနှင့် တွေ့ပါမူ ထိုလူကြီး ဒုက္ခ ရောက်ရလိမ့်မည်ဟု၍လည်း တွေးလိုက်မိသေးတော့၏။

“ခင်ဗျား ပြောချင်တာ ဒီအကြောင်းဆိုတော့ ပြီးပြီပေါ့နော့”

“အဟဲ …၊ မောင်ရင်က ကျုပ်ကို အတင်း နှင်နေပါရောလား၊ မောင်ရင် မယုံဘူးဆိုတာ ကျုပ်သိပါတယ်၊ ဒါပေမယ့်လည်း ကျုပ် ထပ်ပြောရလိမ့်ဦးမယ်ဗျ”

“ဒါဖြင့်လည်း မြန်မြန်သာ ပြောဗျာ”

“ဒီလို မောင်ရင်ရဲ့၊ အခု ကျုပ် မောင်ရင့်ကို ပြတာဟာ နမူနာပဲ ရှိသေးတယ်ဗျ၊ အဲ့ဒီလို ငှက်မျိုးတွေ ရှိတဲ့ နေရာမှာ ရွှေဥ တွေက အပုံကြီးရယ်၊ မောင်ရင် ယုံမလားတော့ မသိဘူး၊ အဲ့ဒီ နေရာကို ကျုပ် သိထားတယ်ဗျ။ သွားရမယ့် ခရီးကတော့ အန္တရာယ်တွေတော့ ရှိတာပေါ့ မောင်ရင်ရယ်၊ လွယ်လွယ်နဲ့ ရနိုင်ရင် လူတိုင်း သူဌေးတွေ ဖြစ်နေမှာပေါ့နော့”

“ခင်ဗျား သိတယ်ဆိုတာကို ကျုပ်က ယုံတယ်ပဲ ထားပါတော့ဗျာ”

“မောင်ရင်၊ ယုံတာ မယုံတာကို ထားဦး၊ ကျုပ် အဲ့ဒီနေရာကို သွားမယ်ဗျ၊ ဒါပေမယ့် အန္တရာယ် ရှိတဲ့ ခရီးကို အဖော် မပါဘဲနဲ့ ခရီး မသွားနဲ့ ဆိုတဲ့ စကားအတိုင်းပေါ့ဗျာ၊ ကျုပ် တစ်ယောက်တည်း သွားမှာထက် ဒီခရီးနဲ့ သင့်တော်မယ့် လူတွေကို ကျုပ်က လိုက်ရှာနေတာပဲ၊ ပြောရရင် မောင်ရင်က ကျုပ်နဲ့ အတူသွားဖို့ သင့်တော်တဲ့ လူတစ်ယောက်ဖြစ်ကြောင်း ကျုပ် ကောင်းကောင်းကြီး စုံစမ်းပြီး သိထားတယ်ဗျ၊ အခု ကျုပ်လာတဲ့ အကြောင်းကလည်း မောင်ရင့်ကို တကူးတက လာဖိတ်တာပါပဲ၊ မောင်ရင် ကျုပ်နဲ့ လိုက်ပါလိုတဲ့ ဆန္ဒရှိတယ်ဆိုရင်တော့ဖြင့် သင်္ဃန်းကျွန်းဘူတာနားက အိမ်မဲကြီး ကိုသာ သန်ဘက်ခါ မနက် လာခဲ့ဗျာ၊ အဲ့ဒီကျရင် အကြောင်းစုံကို ထပ်ပြောပြဦးမယ်”

ဟူ၍ လူကြီးမှ ကျွန်ုပ်အား ပြောလိုက်ပြီးနောက် လက်ဖက်ရည်ဖိုးအား ကျွန်ုပ်အတွက်ပါ ရှင်းပေးပြီးနောက် ကျွန်ုပ်အား “ဆက်ဆက် လာခဲ့နော့” ဟူ၍ နှုတ်ဆက်ကာ ထွက်ခွာ သွားလေတော့၏။ ထိုအခါ ကျွန်ုပ်လည်း ၎င်း၏ ကျောပြင်အား ငေးကြည့်ပြီးနောက် “အရူး” တစ်ယောက်ပါတကားဟူ၍သာ မှတ်ချက်ပြုလိုက်မိလေတော့၏။

By - မဟာရာဇာ အံစာတုံး
================
2:38 AM

ဆိုရုံလေးပါပဲ …

Posted by Sayar Ann
ရွယ်ရည်စူး ထားခဲ့ဖူးသူမို့
ကြိုးစားပြီး မေ့ထားပေမယ့်လည်း
နေရာဟောင်းတွေဆီ ပြန်ရောက်သွားတိုင်း
ဟိုအရင်က အငွေ့အသက်တွေဟာ
ရင်ကိုလာပြီး ရိုက်ခတ်တယ် …

သူ လမ်းခွဲသွားခဲ့စဉ်က
ကမ္ဘာမှာ ယောက်ချာချာနဲ့
နေစရာရှာမရဘဲ အသက်ရှင်ခဲ့ရတယ် …

အချစ်ဦးမို့
ရူးလောက်အောင်ချစ်ခဲ့တာလည်း သူအသိ
ဒါပေမယ့်လည်း
အသည်းကိုတော့
တစ်စစီ ဖဲ့ခြွေသွားခဲ့တယ် …



နှလုံးသားထဲက ဒဏ်ရာ
နာကျင်လွန်းတာကြောင့်
အိပ်မရခဲ့တဲ့ ညတွေရဲ့အလယ်
အရူးတစ်ယောက်လိုပဲ မိုးလင်းခဲ့ရတယ် …

သူ့အတွက်နဲ့ အသည်းလည်း ကျွမ်း
မျက်ရည်လည်း ခမ်းခဲ့တယ် …

အခုတော့
ဒီဒဏ်ရာတွေကို ကုစားရင်း
လူကြားသူကြားမှာ ပြုံးတတ်တဲ့အထိ
တိုးတက်လာခဲ့တယ် …

ခဲမှန်ဖူးတဲ့ စာသူငယ် ဖြစ်ပေမယ့်လည်း
သူ့ရဲ့ နာမည်လေးကိုတော့
နှလုံးသားရဲ့ ထောင့်နားမှာ
လုံခြုံစွာနဲ့ သိမ်းထားခဲ့တယ် …

အချစ်ဦး ….
ဖြစ်ခဲ့ဖူးတယ် ….
ဆိုရုံလေးပါပဲ ………….. ။

By - မဟာရာဇာ အံစာတုံး မောင်ရွာ ရေပုလင်း
=========================
2:19 AM

ချစ်သော စံပါယ်

Posted by Sayar Ann
သူ့ရနံ့က နှစ်သက်စဖွယ် …

သူ့စိတ်ရင်းက ဖြူစင်တယ် ….

သူ့ပွင့်ဖတ်က ယုယချင်စဖွယ် …

သူ့ကို နမ်းရှိုက်မိတော့တယ် …

အို .. ချစ်သော စံပါယ် ………………။

အရှေ့ အရပ်မှာ ကျင်လည်ကာ ကျက်စားနေတဲ့ နေမင်း၊ အနောက်အရက်ကို ပြောင်းရွှေ့ကာ နေရာယူတဲ့အခါ ချစ်သူနဲ့ တွေ့ဆုံခွင့် ရတတ်ပါတယ်။ အဲဒီအခါ ပြောမယ့် စကားတွေကို စဉ်းစားရင်းနဲ့ တစ်ခါတစ်ခါ ထမင်းစားဖို့တောင်မှ မေ့နေတတ်ခဲ့တယ်။ တစ်နေ့လုံးမှာလည်း အပျော်တွေက ပင့်မြှောက်ကာထားလို့ လူတစ်ကိုယ်လုံးလည်း မြောက်တက်နေသလားပါပဲ …။

ပန်းပွင့်လေးတို့ရဲ့ တဖြည်းဖြည်းနဲ့ ပွင့်ဖတ်တွေ ဖွင့်ဟ၊ အလှတွေ ရုပ်လုံးကြွလာပုံကို စောင့်မျှော်ကာ မကြည့်ခဲ့ဖူးပါဘူး။ အေးမြခြင်း သရုပ်ပြ လမင်းရဲ့ ဇာတ်ထုပ်အကကိုလည်း တခုတ်တရ စောင့်မျှော်ကာ အားမပေးဖြစ်ခဲ့ပါဘူး။ ဒါပေမယ့်လို့လည်း စံပါယ်ဆိုသူ ချစ်သူလာမယ့်လမ်း မရောက်ခင် ကတည်းက ကြိုတင်မှန်းလို့ လှမ်းခဲ့မိသူရယ်ပါ။ ဒီလိုပြောတော့ စံပါယ်က ပြုံးတယ်။ “ကို က စကားတတ်တယ်” … တဲ့။ နားဝင်ချိုရုံသက်သက် လုပ်ဇာတ်ခင်းတာ မဟုတ်ပါဘူး ချစ်စံပါယ်။ ရင်တစ်ခုလုံးကို စုံကန်ပြီးမှ ထွက်လာခဲ့တဲ့ စကားတွေရယ်ပါ။ ဒီအခါ စံပါယ်က ဖွဖွလေးပြုံးလို့ ခွန်းတုံ့ဟတယ်။ “ကို တကယ်ချစ်တာ စံပါယ် သိပါတယ် ကိုရယ်” … တဲ့။



စံပါယ်လို့ တင်စား၊ ချစ်သူရဲ့ ထံပါး ကြည်နူးမှု အပြည့်နဲ့ ရောက်ရောက်သွားတတ်တယ်။ ချစ်တဲ့စံပါယ် … သူ့အပြုံးလေးတွေကလည်း အေးမြလွန်းတယ်။ ပြောရရင် စမ်းရေတောင် ရှုံးလောက်မယ် ထင်ပါရဲ့။ မိုးထက်က လမင်း အေးမြခြင်းဟာ မြင်စဉ်ခဏပါကွယ်၊ စံပါယ်အပြုံးက ဒီထက်ပိုတယ်။ အဲ့ဒီ အပြုံး လူတစ်ကိုယ်လုံးဖုံးလို့ တစ်ခါတစ်ခါ မိုးထက်မှာ ပျံဝဲနေသလားဆိုပြီး ကိုယ့်ကိုယ်ကို သံသယဝင်ခဲ့မိတယ်။ ဒီလို ပြောမိတော့ စံပါယ်က ရယ်တယ်။ “အပိုတွေပါ” … တဲ့။ သူ့ရီသံ ချိုချိုလေးတွေက နားထက်မှာ ဆည်းလည်းလေးတွေ ပွတ်တိုက်သွားသလို၊ အို .. တကယ့်ကို ကြည်နူးစရာ ရီသံသာလေးတွေပါပဲကွယ် ….။

ချစ်သူ အလှက ကြည့်လို့မရိုး၊ တစ်နေ့တစ်ခြား ပို၍တိုး ဆိုသလို စံပါယ်ရဲ့ အလှ၊ စံပါယ်ရဲ့ဟန် ဒီရင်ကို ဆူညံစေခဲ့ပေါ့။ ချစ်တယ်ဆိုတာကို ဆုပ်ကိုင်ပြလို့ မရပေမယ့်လည်း စံပါယ်အတွက် ရင်ထဲက လွင့်ထွက်လာတဲ့ စကားလုံးလေးတွေရှိတယ်။ “နွေဦးမှာ တွန်ကျူးတတ်တဲ့ ဥသြငှက်ငယ်လေးကိုလည်း ချစ်တယ်။ မိုးတွင်းမှာ ရွာသွန်းတတ်တဲ့ မိုးစက်ဖွဲဖွဲလေးတွေကိုလည်း ချစ်တယ်။ ဆောင်းဥတုရဲ့ သည်းညှာဦးဖြစ်တဲ့ မြူနှင်းဖွေးဖွေးလေးတွေကိုလည်း ချစ်ပါတယ်။ ဒါပေမယ့်လို့လည်း စံပါယ်ရယ်။ ဒါတွေအားလုံးထက် မင်းကို ပိုပြီးချစ်တယ်…။” ဒီလို ရွတ်ပြတော့ စံပါယ်က ပြုံးတယ်။ “ယုံပါတယ် ကိုရယ်” … တဲ့။

ကြိုလင့်တဲ့ ကမ်းလက်ကို နင်းတက်လို့ မသွားချင်ပါဘူး ချစ်စံပါယ်။ အဲ့ဒီ လက်လေးတွေကို ဖွဖွလေး ဆုပ်ကိုင်ပြီး ယုယမှုအပြည့်နဲ့ ရင်ငွေ့တွေ ကြားမှာ စံပါယ်ကို နွေးထွေးစေချင်သူရယ်ပါ။ တကယ်ပါ စံပါယ်ရယ်။ ခူးဖို့လည်း မရည်ရွယ်၊ ခြွေဖို့လည်း မစဉ်းစား၊ စံပါယ်ရဲ့အနား ရောက်လာခဲ့တဲ့သူပါ။ ရင်ခုန်သံ လှုပ်ရှား၊ စည်းချက် မြန်နေတဲ့ သံစဉ်များဟာ ချစ်ခြင်းရဲ့ နိမိတ်ပါဆိုရင် စံပါယ်ရယ် တိုးတိုးလေးကပ်ပြီးသာ နားထောင်ကြည့်ပါတော့ကွယ်။ ဒီလိုပြောတော့ စံပါယ်က ရင်ခွင်ကြား ငြင်သာစွာ တိုးဝင်လာတယ်။ ပြီးတော့ ပြောသေးတယ်။ “ဟုတ်တယ်၊ ရင်တွေ ခုန်နေတယ်” … တဲ့။

နေဝင်ဆည်းဆာရဲ့ အလှတရား၊ တိမ်တွေ လှပစွာ အရောင်တောက်နေလင့်ကစား ဒီအချိန်ကို ဖမ်းဆုပ်ထားဖို့ ဆုတောင်းနေမိတယ်။ အိပ်တန်းပြန် ငှက်ငယ်တွေကလည်း တစ်အုပ်ပြီး တစ်အုပ်၊ သို့ပေမယ့် အချိန်ကို ဘရိတ်အုပ်လို့ ထားချင်မိပြန်တယ်။ ခဏတာ တွေ့ရတဲ့ အချိန်ဟာ မြန်ဆန်လွန်အားကြီးနေတယ်။ ဒီလို တွေးမိတဲ့ အခိုက်မှာ စံပါယ်က သူ့လက်က နာရီလေးကို ကြည့်ပြီး ပြောတယ်။ “ပြန်ရတော့မယ် ကိုရယ်” … တဲ့။ သူ့ အသံလေးက တိုးလျလျ၊ ခိုးတွေ့ရတဲ့ တစ်ခဏဟာ အလိုမကျ စရာ။ “စံပါယ်ရယ် မခွဲချင်သေးဘူးကွယ်” …။

မဖြစ်နိုင်တော့တဲ့ အခြေအနေမှာ အသုံးပြုတတ်တဲ့ ဝေါဟာရ …။ စကားလုံး တစ်လုံး။ ဒီစကားလုံးကို မနည်းကြိတ်မှိတ်ပြီးသာ မျိုချလိုက်ရတော့တယ်။ ဒါပေမယ့်လို့လည်း စံပါယ်ကိုတော့ ထွေးပွေ့ထားဆဲ။ စပါယ်ရဲ့ အသက်ရှူသံလေးတွေကို နှလုံးသားက ကြားနေရပါတယ်။ “စံပါယ်လည်း ဘယ်ခွဲချင်ပါ့မလဲ ကိုရယ်” .. တဲ့။ သူ့ရဲ့ အသက်ရှူသံလေးတွေကတစ်ဆင့် ပြောနေတဲ့ စကားတွေ နှလုံးသားက အတိုင်းသား ကြားနေရပေါ့။ ဒီလိုနဲ့ တစ်ခဏတာနဲ့ နောက်ဆုံး မိနစ်များမှာ စံပါယ်ရဲ့ ဦးခေါင်းထက်က ဆံနွယ်စလေးတွေကို ကြင်နာစွာ ပွတ်သပ်နေရင်းနဲ့ အနမ်းရဲ့ ပန်းတစ်ပွင့်ဟာ စံပါယ်ရဲ့ ဆံနွယ်စတွေကြား ပွင့်လန်းလို့ သွားခဲ့ပါတော့တယ်။ “သိပ်ချစ်တယ် စံပါယ်ရယ်” …။


By - မဟာရာဇာ အံစာတုံး မောင်ရွာ ရေပုလင်း
==========================
6:57 PM

ည ….. သည်

Posted by Sayar Ann
ည ….. သည်
မှောင်နေ၏ …..။


ည ….. သည်
တိတ်ဆိတ်နေ၏ …..။

ည ….. သည်
အိပ်စက်သူတို့၏
နှစ်သက်ရာလည်း ဖြစ်၏ …..။

ည ….. သည်
တိုးတိုးတိတ်တိတ် အသံတို့
ကြီးစိုးရာလည်း ဖြစ်၏ …..။

ည ….. သည်
အိပ်မက် အများအပြား
ပေါက်ဖွားရာလည်း ဖြစ်နေ၏ …..။



ည ….. သည်
ကြောက်မက်ဖွယ်လည်း
ကောင်းနေ၏ …..။

ည ….. သည်
အိပ်မရသူအတွက်
ပျင်းရိဖွယ်လည်း ဖြစ်တတ်၏ …..။

ည ….. သည်
အနောက်က ချောင်းပြီး ရိုက်တတ်သူနှင့်
တူသေး၏ …..။

ည ….. သည်
“လ” ကို အဖော်ပြု၍
တစ်ခါတစ်ရံ
အေးချမ်းတတ်သေး၏ …..။

ည ….. သည်
မှောင်မိုက်ခြင်းကို ကိုယ်စားပြု၍
“မိစ္ဆာ” စာရင်းအတွင်း
သွပ်သွင်းသင့်ပါသော်လည်း
“အနုပညာ” တည်းဟူသော
ခံစားချက် အနုအလှ၊ အယုအယတို့
ပေါက်ဖွားရှင်သန်ရာလည်း
ဖြစ်နေသောကြောင့်
“မင်းသား” စာရင်းလည်း
သွပ်သွင်းသင့်နေ၏ …..။

ည ….. သည်
ဆိုး၏ ……………….။
ည ….. သည်
ကောင်း၏ ……………..။

အချိန်ကာလတိုင်းသည်
အဆိုးနှင့် အကောင်းတို့
ဒွန်တွဲလျက်သာ
ရှိနေကြတော့၏ ………..။

By - မဟာရာဇာ အံစာတုံး မောင်ရွာ ရေပုလင်း
==========================
6:50 PM

“နေ့မှာ ယင်၊ ညမှာ ခြင်”

Posted by Sayar Ann
ကျနော်ဟာ အညာသားတစ်ယောက်ပါ။

ရွာမှာ ကျောင်းတက်နေရင်း လေးတန်းအောင်တော့ ရန်ကုန်က အဒေါ်ရဲ့ အိမ်မှာ နေပြီး ကျောင်းတက်ဖို့အတွက် အဖေတို့ အမေတို့နဲ့ ခွဲခွာပြီး ရန်ကုန်ဆိုတဲ့ မြို့ကြီးဆီကို ပြောင်းလာခဲ့ရတယ်။ အဒေါ်က အဝေးပြေး ခရီးစဉ်အတွင်းမှာ ပြောခဲ့တယ်။ “ဟိုရောက်ရင် ကက နဲ့ လာကြိုမှာ … တဲ့” ။ ဘာတုန်း “ကက” ဆိုတာ …..? ကျနော် အသက်က ငယ်ငယ်၊ “ကက” ဆိုတာလည်း ဘာကြီးမှန်း မသိခဲ့ပါတယ်။ “ကက” ဆိုတာ ဂျိုကြီးနဲ့များလားကွယ်။

သြော် …. “ကက” ဆိုတာ ကားငယ်ငယ်လေးပဲ။ အဖြူရောင် Taxi လေးကို မြင်လိုက်တော့ စိတ်ထဲမှာ အဲဒီလို တွေးမိလိုက်ပါတယ်။ စီးရတယ် မိုက်တယ်ဟ။ ရွာက ကားနဲ့များကွာပါ့။ ရွာက ကားစီးရင် ကျောက်ခဲငုံသွားရင်တောင် အစာကြေလောက်တယ်။ ခုန်လွန်းလို့။ ဒါဟာ ရန်ကုန်ရဲ့ မြေပေါ် ခြေချတဲ့အခိုက်မှာ ပထမဆုံး ရင်းနှီးခွင့်ရခဲ့တဲ့ စကားဟာ အဲဒီ “ကက” ပဲ ဖြစ်ခဲ့ပါတယ်။


“ကက” ကို စီးရင်း အဒေါ်တို့ နေတဲ့အိမ်ဆီကို လာတဲ့ လမ်းတစ်လျောက် ဘေးဘီဝဲယာမှာရှိနေတဲ့ ဆိုင်းဘုတ်တွေကို လိုက်ဖတ်ရင်း တစ်ယောက်တည်း စိတ်ထဲကနေ ဝေဖန်နေခဲ့တယ်။ ဒီလိုနဲ့ ကားရဲ့ ရှေ့ခပ်လှမ်းလှမ်းမှာ နည်းနည်းဆန်းတဲ့ ဆိုင်းဘုတ်တစ်ခုကို လှမ်းမြင်လိုက်ရတယ်။ “ဆန် ဒီမှာဝယ်ပါ” … တဲ့။ “ အောင်မာ … ကြီးကြီးကျယ်ကျယ် ဆန် ဝယ်တာတောင် သူ့ဆိုင်မှာ ဝယ်ရမယ်လို့။ ဘာဖြစ်လို့ ဝယ်ရမှာတုံး ” … လို့ စိတ်ထဲကနေ ဝေဖန် လိုက်ပြန်ပါတယ်။ ကျနော်လည်း ဝေဖန်လို့ ဆုံးရော စီးလာတဲ့ ကားလေးဟာ အဲဒီ ဆိုင်းဘုတ်ရှိတဲ့ ဆိုင်ထဲကို တန်းပြီး ဝင်သွားပါတော့တယ်။

ကိုင်း ….. ရောက်ပြီတဲ့။ “ဟိုက် … သေပဟ” ………..။ သြော် ငါဝေဖန်တဲ့ဆိုင်က ငါ့အဒေါ်အိမ်ပါပဲလားဟရို့။ ဒီအဖြစ်လေးကတော့ ရန်ကုန်ကို ပထမဆုံး ရောက်ခဲ့စဉ်က ဟာသဆန်တဲ့ အလွဲလေးတစ်ခုပဲ ဖြစ်ခဲ့ပါတယ်။

ကျောင်းတက်တော့ သူငယ်ချင်းတွေက နာမည်ကို မခေါ်ဘူး။ “အညာသား” လို့ ခေါ်ကြတယ်။ ဒီလို ခေါ်တဲ့ သူတို့လေသံတွေက လူကို နည်းနည်း နှိမ်သလိုလိုနဲ့ ခေါ်ကြတယ်လို့ ထင်မိတယ်။ ကျူရှင်တက်တော့ ကျူရှင်အိမ်က အဘွားက ဟောဒီလို ခေါ်တယ်။ “ရွှေညာသား” … တဲ့။ ဟုတ်တယ်။ ကျုပ်ဟာ အညာသားပဲ။ ဒါပေမယ့် ရွှေညာသား ရယ် ……… ။ အဲဒီလို ကိုယ့်ကိုကိုယ် ကြံဖန်ပြီး ဂုဏ်ယူမိခဲ့ပါသေးတယ်။

“ကျနော်” … ဆိုတာကို ပြောဖို့အတွက် ရန်ကုန်ကို ရောက်စက တော်တော်ကို ကြိုးစားပမ်းစား လေ့ကျင့်ခဲ့ရတယ်။ ရွာမှာဆို ကျုပ်ကလေ … ကျုပ်ကနဲ့ … တစ်ကျုပ်ထဲ ကျုပ်ကို သုံးလာခဲ့တဲ့လူ။ ဒီရောက်မှ ကျနော်လို့ ပြောရမယ်တဲ့။ ကျုပ် … အဲလေ … ကျနော် ရန်ကုန်ကို ပထမဆုံး ရောက်ခဲ့တဲ့နှစ်မှာ ကျောင်းစာနဲ့အတူ အဲဒီ ကျနော် ဆိုတဲ့ စကားပြောကိုပါ ပြင်းပြင်းထန်ထန် ပြင်ဆင် လေ့ကျင့်ခဲ့ရပါတယ်။

အညာသားမို့ ပွင့်လင်းတယ်။ ရန်ကုန်ကို ရောက်လို့ မကြာခင်မှာပဲ ဘေးနားက စတိုးဆိုင်အိမ်မှာ အလှူတစ်ခု လုပ်တယ်။ ကျနော့်ကိုလည်း လာစားလှည့်တဲ့။ အဲဒီနေ့ မနက်မှာ အပီအပြင် ဆွဲပစ်လိုက်ဖို့ ကလေးပီပီ ဟန်ချီခဲ့ပါတယ်။ ဒီအချိန်မှာ တစ်စုံတစ်ယောက်သောသူ (သေချာတော့ မမှတ်မိတော့ပါ) က လာပြောတယ်။ ရန်ကုန် အလှူတွေမှာ အစားစားရင် ဟန်ဆောင်ပြီး စားရတယ်တဲ့။ အဲဒီ စကားဟာ ဘယ်အထိ တာသွားမယ်ဆိုတာကို သိခဲ့ရင် အဲဒီလူပြောခဲ့တာကို နားထောင်ခဲ့မှာ၊ နားယောင်ခဲ့မှာ မဟုတ်ဘူး။ သို့ပေသိပေါ့လေ ………….။

အလှူကိုရောက်တော့ စားစရာတွေက ရှယ်တွေချည်းပါပဲ။ ကျနော် အညာသား အမှန်အကန် စားပစ်လိုက်ချင်တာ။ ဒါပေမယ့် ဟန်ဆောင်ပြီး စားရတယ်ဆိုတဲ့ စကားကြောင့် မဝတဝ သာ စားပြီး ထပြန်လာခဲ့ပါတယ်။ အဲဒီနေ့က ကျနော့်ရဲ့ စိတ်ထဲမှာ ဆန့်ကျင်ဘက် စိတ်နှစ်ခုတို့ လွန်ဆွဲနေခဲ့ပါတယ်။ တစ်ခုက မနက်က အလှူမှာ အောင်မြင်စွာ ဟန်ဆောင် စားနိုင်ခဲ့လို့ ရန်ကုန်ရဲ့ ဓလေ့တစ်ခုကို လုပ်နိုင်ပြီကွလို့ အားရသလိုလို ရှိတဲ့စိတ် ဖြစ်ပြီး နောက်တစ်ခုကတော့ ဒီအတိုင်းကြီးသာ အလှူတွေမှာ စားရရင်တော့ မနှိပ်ပါဘူးကွာ ဆိုတဲ့ စိတ်တို့ပဲ ဖြစ်ပါတော့တယ်။

ရန်ကုန်ကို စရောက်ပြီး မကြာခင်မှာ ရန်ကုန်အကြောင်း ရွာကလူတွေ မေးရင် ဘယ်လို ဖြေရမလဲလို့ စဉ်းစားမိခဲ့တယ်။ ဒါကြောင့် ရန်ကုန်မှာ ဘာတွေများ ထူးခြားသလဲလို့ ကြည့်ခဲ့တယ်။ ရန်ကုန်မှာ ကိုယ်စားချင်တာကို ရွာမှာလို မြို့ပေါ်ထိ တစ်နေကုန် တက်ဝယ်စရာမလိုဘဲ ကိုယ့်အနီးအနား ပတ်ဝန်းကျင်မှာပဲ အလွယ်တကူ ဝယ်စားလို့ ရနိုင်တယ်။

ဈေး … တဲ့။ ဈေးတောင်မှ ရိုးရိုးဈေး မဟုတ်ဘူး။ “ပတ္တမြားဈေး” .. တဲ့။ အဲဒီဈေးနာမည်ကလည်း ကြီးကြီးကျယ်ကျယ်။ အဲဒီဈေးက ကျနော်တို့ အိမ်နဲ့ နီးနီးလေးပဲ။ အစုံလည်း ရတယ်။ မနက်တိုင်း အဒေါ်နဲ့ ဈေးလိုက်သွားပြီဆို မုန့်ဟင်းခါး စားရတယ်။ ရန်ကုန်က မုန့်ဟင်းခါးက ရွာက မုန့်ဟင်းခါးနဲ့ မတူဘူး။ စားလို့ပိုကောင်းတယ်လို့ ထင်ခဲ့မိပါတယ်။ အောင်မာ တစ်ခါတစ်ခါ မုန့်ဟင်းခါးက ကြက်ဥလေးနဲ့ဗျ။

ပြီးတော့ ကျနော် တွေ့မိတဲ့ ရန်ကုန်ရဲ့ ထူးခြားချက်က နေ့ဘက်မှာဆို ယင်တွေကို တွေ့ရတယ်။ ညဘက်မှာဆို ခြင်တွေက ကိုက်တယ်။ ဒီအချက်ကတော့ ရန်ကုန်ထက် ရွာက သာတဲ့အချက်ပဲ။ သို့ဂလိုကြောင့် ကိုယ့်ရွာကို အမွန်းတင်လိုတဲ့ စိတ်နဲ့ ရန်ကုန်မှာ ဘာတွေ ထူးခြားသလဲလို့ မေးရင် ဒီလို ဖြေမယ်လို့ ဆုံးဖြတ်ခဲ့ပါတယ်။ “နေ့မှာ ယင်၊ ညမှာ ခြင်” … အဲဒါ ရန်ကုန်ပင်။

ဝန်ခံချက် ။     ။ အထက်ပါ စာစုများမှာ ကျနော် ရန်ကုန်ကို စရောက်ခဲ့စဉ်က ဖြစ်ခဲ့တဲ့ အမှတ်ရစရာ အဖြစ်အပျက်၊ အကြောင်းအရာတွေပါပဲ။ ငယ်ငယ်က ရန်ကုန်ကို စရောက်ခဲ့တုန်းက အကြောင်းကို တွေးမိရင်း ယခုကဲ့သို့ ဟိုရောက်ဒီရောက် စာစီလိုက်ခြင်း ဖြစ်ပါကြောင်း …… ။ ထိုစဉ်က ကလေးတစ်ယောက်၏ စိတ်ထဲ ဖြစ်မိသမျှကို ပြန်တွေးမိရင်း ရေးသားခြင်းသာ ဖြစ်ပါကြောင်း ….. ။

ကျွန်ုပ်၏ ဟိုရောက် ဒီရောက် စာများအား လာရောက် ဖတ်ရှုကြပါကုန်သော အရပ်ကတို့အား ကြိုတင်၍ ကျေးဇူးတင်ရှိသည်ဟု ပြောလိုပါကြောင်း …….. ။

By - မဟာရာဇာ အံစာတုံး
===============
6:44 PM

အကယ်၍သာ …..

Posted by Sayar Ann
အကယ်၍သာ …
ယခုအချိန်တွင် သေဆုံးသွားခဲ့ပါရင်
ကျွန်ုပ်အတွက် ..
ငိုကြွေးမည့်သူ မည်သူရှိမည်နည်း ..
ကျွန်ုပ်အား ..
တမ်းတမည့်သူ မည်သူရှိမည်နည်း …

ကျွန်ုပ်၏ အသုဘအား
စိတ်ပါလက်ပါ ဆောင်ရွက်ပေးမည့်သူ
မည်သူ ရှိမည်နည်း …
ကျွန်ုပ်အတွက် ငွေတစ်မတ်
မည်သူ ထည့်ပေးပါမည်နည်း …

ကျွန်ုပ်၏ နောက်ဆုံးခရီးအား
လိုက်ပါပို့ပေးမည့်သူများမှာ မည်သူတို့ ဖြစ်မည်နည်း
ကျွန်ုပ်အတွက် စာတိုပေစ
ဘယ်သူက ရေးမည်နည်း …
ကျွန်ုပ်၏ အမည်အား
မည်သူက မှတ်တမ်းထားမည်နည်း ..



ကျွန်ုပ်အတွက် မည်သူက
အမျှပေးဝေမည်နည်း …
ကျွန်ုပ်အတွက် ရက်လည်ဆွမ်းသွပ်
မည်သူက ပြုလုပ်ပေးမည်နည်း …

အကယ်၍သာ …
သေလွန်ပြီး တစ်နှစ်ခန့်ကြာသည့်အခါ …
မည်သူက ကျွန်ုပ်အတွက်
အမှတ်တရ ဖြစ်နေမည်နည်း …
မည်သူက မှတ်မှတ်ရရ
ကုသိုလ်တွေ ဝေမျှပါမည်နည်း …

__________________________

အကယ်၍သာ …
သေလွန်ပြီးနောက် …..
ကံမကောင်း အကြောင်းမလှ၍
တိရစ္ဆာန် ဘုံဘဝ ရောက်ခဲ့ရပါက
အသားစား သတ္တဝါ
မဖြစ်ပါရစေနဲ့ …

အကယ်၍သာ …
ပြိတ္တာဘဝသား ဖြစ်ရပါကလည်း
ရဟန်းသံဃာနဲ့ နီးရာ
ခိုကပ်စားရသူသာ ဖြစ်ရပါစေ …

အကယ်၍သာ …
အသူရကာယ် သံသရာ
ကျင်လည်ရပြန်ကလည်း
နေ့စံသည့်အချိန်
ကောင်းမှုပြုနိုင်ပါစေ …

အကယ်၍သာ …
ငရဲအိုးမှာ တိုးဝှေ့ရပါကလည်း
ပြုခဲ့သည့် အပြစ်တို့ ကျေစေ …
ငရဲအိုးမှ တက်ရပါက
နိဗ္ဗာန်ကို မျက်မှောက်ပြုရသူ ဖြစ်ပါစေ …

အကယ်၍သာ …
နတ်ပြည်ဗိမ္မာန် စံမြန်းရပါက
ဥယာဉ်စခန်းမှာသာ အချိန်မကုန်ရ
တရားသဘင်မှာ ပျော်ရွှင်ရသူသာ
ဖြစ်ရပါစေ …

အကယ်၍သာ …
နတ်တို့၏မင်း သကြားမင်း
ဖြစ်ခဲ့ပါကလည်း
လူ့ဘုံကို ဆောင်မ
သာသနာ ထွန်းပအောင်
တွန်းအားပေးတတ်သူသာ ဖြစ်ရပါစေ …

အကယ်၍သာ …
ဈာန်အရာကြောင့်
ဗြဟ္မာဘဝ ရောက်ခဲ့ပါက
မေတ္တာ၊ ဂရုဏာ လွမ်းခြုံကာနဲ့
အေးချမ်းတဲ့ဓါတ်တွေ
သာသနာကို ဖြန့်ကြက်နိုင်ပါစေ …

အကယ်၍သာ …
လူ့ဘုံဘဝ ပြန်ရပါက
ဝိနည်းနဲ့ညီ
ရာဂမီးကို ငြိမ်းသတ်
ကိလေသာတောမှ ရုန်းထွက်
အဆုံးမသတ်တဲ့
သံသရာ ချားရဟတ်ကိုလည်း ရပ်
ရဟန်း အဖြစ်ကို ရည်မှန်းလျှက်
ကြည်သန့်တဲ့ အဖြစ်ကိုသာ
မျှော်တွေးမိပါတော့သတည်း …………………… ။

By - မဟာရာဇာ အံစာတုံး မောင်ရွာ ရေပုလင်း
==========================
2:31 AM

ခေါင်းစဉ်မဲ့

Posted by Sayar Ann
မညှာမတာ
ငါ့ကိုယ်ငါပဲ အပြစ်ဖို့တယ်
ချစ်တတ်လွန်းလို့ …

ခေါင်းခါပါတယ်
မုန်းမေ့ဖို့ တွေးလိုက်မိတိုင်း
သူ့တံခါးကို
အတင်းပိတ်ထားတယ်
ရင်ထဲက ခပ်ဆိုးဆိုးနှလုံးသားက
မုန်းဖို့အင်အား မရှိဘူး …… တဲ့





တစ်ကို နုတ်ကြည့်ပါလား
သုံးကနေ နှစ်ဖြစ်ချင်ရင်
ပတ်သက်ခဲ့သမျှ
မှတ်ဉာဏ်တွေအကုန်လုံးကို
ခဏလောက်ဖြစ်ဖြစ်
မေ့ကြည့်ပါသေးတယ်
ဒါပေမယ့်လည်း
သံယောဇဉ်လက်ကျန်က
ရင်ထဲမှာ တွင်းတူးပြီးနေတယ်

အချစ်ဦးမို့
တစ်သက် မမေ့ဘူး
သူ့အတွက်
ဒီလူမှာ ငိုနေရတာ
မြင်နိုင်မှာမှ မဟုတ်တာ

ဇာတ်လမ်းပြီးကတည်းက
မဆိုင်သလို မျက်နှာထားနဲ့
ရင်ခုန်ခြင်းတွေ ရပ်တန့်သွားတဲ့
ငါ့ဘဝရဲ့ အချစ်ရဆုံးသူ
နေ့စွဲတိုင်းမှာ
ရေးမှတ်ထားခဲ့တဲ့
ဒိုင်ယာရီ စာမျက်နှာတွေထဲမှာလည်း
သူ့နာမည်လေးကတော့
အစဉ်အမြဲ ပါနေဆဲ

တကယ်လို့များ
နောက်ဘဝဆိုတာရှိခဲ့ရင်
ချစ်တတ်တဲ့ နှလုံးသားနဲ့
အမျိုးမတော်ပါရစေနဲ့
ခံစားတတ်လွန်းလို့ …………… ။

By - မဟာရာဇာ အံစာတုံး မောင်ရွာ ရေပုလင်း
==========================
2:27 AM

ချစ်သူ = မိုး

Posted by Sayar Ann
မိုးက
အငြိုးနဲ့ ရွာ
လေတွေလည်း ပါတယ် …


သစ်ပင်တွေ ယိမ်းထိုး
အငြိမ်းနဲ့ မိုးမင်းသမီးရယ်
ငါ့တစ်ကိုယ်လုံးကို
ရွှဲရွှဲစိုစေတယ် …


မနက်က နေသာလို့
ထီးက မပါ
ဒီလို အခါမှ
မင်းက တအားရွာချတယ် …


မင်း …
ရက်စက်တယ်ကွယ် ….. ။

By - မဟာရာဇာ အံစာတုံး မောင်ရွာ ရေပုလင်း
===========================
1:07 AM

ချစ်သူ …

Posted by Sayar Ann
ငါ့အချစ်တွေကို ယူ
အတူနေမယ်လို့ မြှူဆွယ်ခဲ့သူ
ငါ့လို ခပ်ထူထူလူကို
လှည့်စားဖို့အတွက်ပဲ
ရည်စူးထားခဲ့သူ ……………… ။


By - မဟာရာဇာ အံစာတုံး မောင်ရွာ ရေပုလင်း
===========================
12:49 AM

ခေါင်းစဉ်မဲ့ (ကဗျာ)

Posted by Sayar Ann
ကောင်းကင် ရဲ့အောက်
မြေကြီးရဲ့အပေါ်
ခေါ်သူမရှိဘဲ
လမ်းသလားနေခဲ့တဲ့ နေ့က
သူမနဲ့ စတင်တွေ့ခဲ့ရ …

သူမရဲ့အလှကို ကဗျာစီ
ကာရန် မညီပေမယ့်လည်း
ရင်ထဲက ခံစားချက်နဲ့တော့
ကွက်တိပဲ …

ကျုပ်ကဗျာက
သူမကို Heart ထိ
အတိအကျပြောရရင်
ဖေဖော်ဝါရီ (၁၂) ရက်
အဲဒီနေ့က
သူမ ကျုပ်အချစ်ကို လက်ခံခဲ့ …




ဆုံရန် …… တဲ့
အချိန်တွေ အကုန်မြန်နေခဲ့
ပုံမှန်မဟုတ်တဲ့ ရင်ခုန်သံတွေနဲ့
သူမအပေါ်မှာ
အချစ်ကြီး ချစ်ခဲ့တယ် …

တကယ်ပါ
ဆယ်ခါမက ကျိန်ဝံ့ပါတယ်
တိမ်တွေ လွင့်နေတာ
လေတိုက်လို့ မဟုတ်လား
အဲဒီလိုပဲ
ရင်ထဲက အချစ်တွေက တွန်းပို့လို့
သူမရဲ့ဘေးနား
ရောက်ရောက် လာတတ်ခဲ့တာပါ …
ဒါကိုပဲ သူမက စွပ်စွဲတယ်
‘သူ့ကို မယုံလို့ပါ’ … တဲ့

အဲဒီက မြစ်ဖျားခံ
ထန်လွန်းတဲ့ လေတွေတိုက်
ကာသွားခဲ့ တံတိုင်းတစ်ခု
‘သူမကို မယုယနဲ့တော့’ … တဲ့

သူမရဲ့ နှုတ်ဖျားက
ပြောထွက်ခဲ့စကား
ကျုပ်ကို ဆွံ့အသွားစေခဲ့
‘မချစ်တော့ဘူး’ ……………….. တဲ့ ။

By - မဟာရာဇာ အံစာတုံး မောင်ရွာ ရေပုလင်း
=========================
12:18 AM

အော် … အချစ် … အချစ် …

Posted by Sayar Ann
အချစ် … အချစ် … အချစ်
ဆေးလိပ်လေး တစ်လိပ်လောက်မှ သောက်မကောင်းတဲ့ အချစ် …

မိုးတိမ်တွေ ဖုံးနေတဲ့ ကောင်းကင်ပြာလို
အရောင်တွေ လွင့်ပြယ်သွားပြီဖြစ်တဲ့ အင်္ကျီတစ်ထည်လို
အတောင်ကျိုး ငှက်တစ်ကောင်လို
ဘာမှကို မကောင်းဘူး …

သူများတွေ ပြောကြတာတော့ ပျော်စရာကြီး
ကိုယ်တိုင် စမ်းစစ်ကြည့်တော့ ပျင်းစရာအတိ
သူမှားလား ကိုယ်မှားလား မသိ လမ်းခွဲခဲ့၏ …



အချစ်နဲ့ ပတ်သက်ပြီး
ကမ္ဘာ့စံချိန်ကို ရိုက်ချိုးလိုက်သော တာတိုပြေးသမားလို့
ကိုယ့်ကိုယ်ကိုပဲ ကင်ပွန်းတပ်လိုက်တယ်
(လက်ဖက်မပါ၊ ကွမ်းမပါ) …

ချိန်းတွေ့ခဲ့တာ ခုနစ်ခါ
သိမ်းပြီး မေ့ခဲ့ရတာ တစ်သက်တာ
ဟား … ဟား …
နာကျင်စရာကြီးပဲ အတိတ်ကို စောင်းကြည့်တော့
အဆိုတော်ကြီးရဲ့ လုပ်စမ်းပါဦး ကျုပ်အတွက် တစ်ပုဒ်လောက် …

အလွမ်းဖြေစရာပေါ့ ဖြန်းလေကသော့
ပန်းတွေဝေကရော့ ပင်လယ်ရေက ပေါ့
ကျုပ်အတွက်ဆိုရင်တော့ အရောင်တွေက ခပ်ဖျော့ဖျော့ …

ထမင်းရေကျဲကျဲကို သောက်ပြီး
ဖျာစုပ်လေးပေါ်မှာ တူနှစ်ကိုယ် နေရရင်လည်း ပျော်ပါတယ်
အဲ့ဒီလိုလည်း ပြောခဲ့တယ်
ခုတော့လည်း အလိုမတူ စိမ်းကားသွားပါတဲ့
အိုဘယ့် … မိစိမ်းကားလေးရယ် …
မျက်စိမှိတ်လို့ ယုံမိခဲ့ပါသည် သူ့စကားတွေ
ပစ်ခွာသွားခဲ့သော အရှုံးသမား ကျန်လေပြီ …

လေတွေကလည်း တိုက်လွန်းလှတယ်
မိုးတွေကလည်း ရွာလွန်းအားကြီးနေတယ်
ကံဆိုး မိုးမှောင်ကျမယ့် နေ့တစ်နေ့ကိုလည်း ကြိုပြီး မသိနိုင်ခဲ့လေတယ်
တကယ်လို့သာ ကြိုသိခဲ့ရင်
ဆယ်ခါဖို့ခါ မြေမြုပ်လိုက်ချင်
မြင့်မိုရ်တောင်မက အချစ်စိတ်တွေကိုပင် ………… ။


By - မဟာရာဇာ အံစာတုံး မောင်ရွာ ရေပုလင်း
===========================
9:09 PM

ဂူ ……..

Posted by Sayar Ann
ဂူ …
ယူပါ
ငါ့ရဲ့ ကြေကွဲမှုတွေ …

ဂူ …
ယူပါ
ငါ့ရဲ့ ဝမ်းနည်းခြင်း အထိမ်းအမှတ်
မျက်ရည်စက်တွေ …

ဂူ …
ယူပါ
ငါ့ရဲ့ နှမြောတွန့်တိုမှုတွေ …

ဂူ …
ငါ့ အချစ်ဆုံးသူကို ယူ
အပူတွေလည်း ပေး
ခပ်လေးလေး
ခြေလှမ်းတွေနဲ့
အိမ်ပြန်စေခဲ့ပြီ …..။

By - မဟာရာဇာ အံစာတုံး | မောင်ရွာ | ရေပုလင်း
===========================

6:50 PM

ငါဟာ ငါပါပဲ

Posted by Sayar Ann
ငယ်ရွယ်၊ လွတ်လပ်
အကန့်သတ်မဲ့စိတ်ကူးနဲ့
ငါ့ရဲ့အိပ်မက်ထဲမှာ
ကမ္ဘာကြီးကို ပြောင်းပစ်မယ် …


အသက်ကလေးရလာ
ပညာဆိုတာ နည်းနည်းသိ
ပြန်ကြည့်လိုက်တော့မှာ
ကမ္ဘာကြီးဟာ ကမ္ဘာကြီးပါပဲ . . .



အိပ်မက်ကို ဈေးဆစ်
ငါချစ်တဲ့ငါ့တိုင်းပြည်
တစ်ခုခုဖြစ်ရမည်ပေါ့
သည်တစ်ခါလည်း
တိုင်းပြည်ဟာ တိုင်းပြည်ပါပဲ . . .

ဘ၀ရဲ့ဆည်းဆာချိန်
အိပ်မက်တွေ အရှိန်ကုန်စ
ဇနီးမယား သမီးသားအတွက်
ပေးဆပ်ဖို့ ကြိုးစားဆဲ
သူတို့လည်း သူတို့ဘာသာ
မိသားစုဟာ ဒီအတိုင်းပါပဲ . . .

သေရာညောင်စောင်း
လဲလျောင်းချိန်ရောက်တော့မှ
ငါ သိရပြီ (ပထမဦးဆုံးအကြိမ်ပါ)
ငါဟာ ငါပဲ၊ ဘာမှ မပြောင်းလဲ . . . . . ။


ကျော်ဝင်း
“နှစ်ဆယ့်တစ်ရာစု သားရွှေဥ” စာအုပ်မှ
6:48 PM

လမ်းခွဲညနေ

Posted by Sayar Ann
အဲဒီနေ့ ညနေက
မိုး မရွာဘူး
နေလည်း မသာပါဘူး …

အပြုံးနဲ့ လမ်းခွဲဖို့ ပြောခဲ့တယ်
ကျနော့်ဘက်က မဟုတ်ဘူး
သူ့ဘက်က ….

စိတ် မဆိုးပါနဲ့ … တဲ့
ပြီးတော့ …
ဘယ်လို ခံစားရလဲ … တဲ့
အဲဒီအချိန်က သူမ ပြောခဲ့တဲ့စကား
ခုထိ ကြားယောင်နေသေးတယ် ….



စိတ် မဆိုးပါဘူး ..
ငါ မပြောတတ်ဘူးဟာ …
ငါ ဘာမှ မပြောတတ်တော့ဘူး ….
ငါ သွားတော့မယ် …..

သူမရဲ့ဘေးက
ဒဏ်ရာ အနာတရနဲ့ ထွက်ခွာခဲ့စဉ်က
ကျနော် ဒါတွေပဲ ပြောတတ်ခဲ့ပါတယ်
တကယ်ပါပဲ …
ရင်ထဲက ခံစားချက်တွေကို
ပုံဖော်ဖို့ စကားလုံးတွေက
အဲဒီ အချိန်မှာ
ဘာဖြစ်လို့ ပျောက်နေခဲ့ရတာလဲ …

ရင်ထဲမှာ
ခါတိုင်းထက် တအားလေးနေတယ်
သူမကို ချစ်ခဲ့တဲ့ အချစ်တွေ
နေရပ်ပြန်လာလို့ ထင်ပါရဲ့ …

ရည်ရွယ်ထားသမျှ ပြာကျ
ခံစားရသမျှကိုလည်း
သူမထံပါး ရင်ဖွင့်ကာ ပြလိုက်ချင်ရဲ့
ဒါပေမယ့် ….

နှလုံးသားရဲ့
ဟိုးးးးးးး အနက်ရှိုင်းဆုံးဆီကို
တစ်စုံတစ်ခု ပစ်ချလိုက်တယ်
“အချစ်ဦး ပစ်သွားခဲ့ဖူးတယ် …
အပြုံးနဲ့ လမ်းခွဲခဲ့၊ ဒီနေ့ ဒီရက် ……………။


By - မဟာရာဇာ အံစာတုံး | မောင်ရွာ | ရေပုလင်း
===========================
6:44 PM

ဥစ္စာစောင့်တွေရှိတဲ့ တောင်

Posted by Sayar Ann
ကျနော်တို့ရွာမှာ ၉ ခုစီရှိတဲ့ အရာတွေရှိပါတယ်။ အဲဒါတွေကတော့ တောင်ကိုးလုံး၊ စမ်းကိုးတွင်း၊ မန်ကျည်းကိုးပင် တွေပဲ ဖြစ်ပါတယ်။ တောင်ကိုးလုံးထဲမှာ အမြင့်ဆုံးဖြစ်တဲ့ တောင်ကတော့ ကျောက်ပုထိုး တောင်ပဲ ဖြစ်ပါတယ်။ ကျောက်ပုထိုးတောင်နဲ့ ပတ်သက်ပြီး ပါးစပ်ရာဇဝင်တွေကတော့ မြောက်မြားစွာပါပဲ။ အပြောအများဆုံးကတော့ အဲဒီ ကျောက်ပုထိုးတောင်မှာ ဥစ္စာစောင့်တွေ ရှိတဲ့အကြောင်းပဲ ဖြစ်ပါတယ်။


ဥစ္စာစောင့်တွေ ရှိတယ်ဆိုတဲ့ တောင်

ဥစ္စာစောင့်တွေနဲ့ မျက်မြင်ကိုယ်တွေ့ တွေ့ခဲ့၊ ကြုံခဲ့ရတယ် ဆိုတဲ့ လူတွေရဲ့ အကြောင်း၊ ဥစ္စာစောင့်တွေက နေရာ လဲဖို့ဆိုပြီး ခေါ်တယ်ဆိုတဲ့ လူတွေရဲ့ အကြောင်း စသည်ဖြင့် အများကြီးပါပဲ။ ကျောက်ပုထိုး တောင်ပေါ်ကို တက်ရင် မပြုလုပ်ရမယ့် စည်းကမ်းချက်တွေ ရှိပါတယ်။ အဲဒါတွေကတော့ တံတွေး မထွေးရ၊ မဆဲမဆိုရ၊ အညစ်အကြေး မစွန့်ရ ဆိုတာတွေ ပါပဲ။

တောင်ပေါ်တွင် ဖူးတွေ့ရသည့် ထုံးဖြူဖြူ စေတီလေးတစ်ဆူ

အကယ်၍များ ဒါတွေ ပြုလုပ်မိလို့ရှိရင်ဖြင့် အကြီးအကျယ် ဖျားနာခြင်းမှအစ အသက် သေဆုံးသည်အထိ ဖြစ်တတ်တယ်လို့ ပြောကြပါတယ်။ သို့ပေသိ တစ်ခါတစ်ရံတွင်မတော့ ဒါတွေ ပြုလုပ်မိလို့ရှိရင် သတိပေးတဲ့ အနေနဲ့ မြွေကြီးများအသွင်သဏ္ဍာန် ပြသတတ်တယ်လို့ ဆိုပါတယ်။ ဥပမာအနေနဲ့ ကျနော့်ညီ တစ်ဝမ်းကွဲရဲ့ အဖြစ်ကို ပြောရရင် – သူက တောင်ကိုးလုံးမှာ အပါအဝင်ဖြစ်တဲ့ ကျောက်တုံးကြီး တစ်လုံးပေါ်မှာ ဆော့ကစားရင်းနဲ့ အဲဒီ ကျောက်တုံးကြီးပေါ်မှာ အညစ်အကြေး စွန့်ခဲ့ပါတယ်။ အဲဒီနေ့ ညလည်း ရောက်ရော ဖျားပါလေရော။

ဆေးသောက်၊ ဆေးထိုး လုပ်ပေမယ့် သူ့အဖျားက မကျသွားတဲ့အပြင် ပိုလို့တောင် ဆိုးလာခဲ့ပါတယ်။ အပူတွေ များလွန်းလို့ မျက်လုံးတောင် ဖွင့်မရတဲ့ အခြေအနေထိပါပဲ။ အဲဒီအခါ အမေဖြစ်သူက အဲဒီနေ့က ဘာတွေ လုပ်ခဲ့တယ်ဆိုတာကို စုံစမ်းလိုက်တော့ တောင်ပေါ်မှာ အညစ်အကြေး စွန့်ခဲ့တာကို သိသွားပါတယ်။ ဒါနဲ့ အဲဒီ တောင်ဆီသွားပြီး တောင်းပန်သမှု ပြုခဲ့ပါတယ်။ အဲဒီနောက်မှ အဖျားက ချက်ချင်းဆိုသလို ကျသွားပြီး သက်သာရာ ရခဲ့ပါတယ်။

ကျောက်ပုထိုးတောင်မှာ ဂူပေါက်တစ်ခုလည်း ရှိပါတယ်။ လူကြီးတွေရဲ့ ပါးစပ်ရာဇဝင်အရ အရင်တုန်းက ပွဲလန်းသဘင်ရှိပြီဆို အဲဒီဂူပေါက်ဆီသွားပြီး ဥစ္စာစောင့်တွေဆီက ရွှေ၊ ငွေ၊ လက်ဝတ်ရတနာတွေ ငှားရမ်းလို့ ရတယ်လို့ ဆိုပါတယ်။ နောက်ပိုင်းမှာ အချို့အချို့သော အကျင့်မကောင်းသူများရဲ့ အကျင့်ကြောင့်၊ တစ်နည်းအားဖြင့် ငှားပြီး ပြန်မပေးတတ်သည့် အကျင့်ကြောင့် မငှားကြတော့ဘူးလို့ ဆိုပါတယ်။

တောင်နံဘေးမှ ဂူပေါက်

ပြီးတော့ ဂူနဲ့ ပတ်သက်လို့ နောက်ပိုင်းခေတ်မှာ ရွာထဲက လူတွေက စူးစမ်းခဲ့ဖူးပါတယ်။ ဘယ်လိုလဲဆိုတော့ ဂူဘယ်လောက် ပေါက်သလဲဆိုတာ သိရအောင်လို့ အပ်ချည်ကြိုးကို အသုံးပြုပြီး ဂူထဲဝင်သွားတာ အပ်ချည်ကြိုး ဆုံးတဲ့ထိအောင် ဂူက မဆုံးသေးဘူးလို့ ဆိုပါတယ်။ အဲဒီဂူထဲမှာ ဘာတွေ တွေ့လဲဆိုတာတော့ မသိရပါဘူး။ ဒါကတော့ ဥစ္စာစောင့်တွေ ရှိတယ်ဆိုတဲ့ ကျနော်တို့ရွာက ကျောက်ပုထိုး အမည်ရတဲ့ တောင်နဲ့ သူ့ရဲ့ ဂူပေါက် အကြောင်းများပါပဲ။


By - မဟာရာဇာ အံစာတုံး
================
12:18 AM
Subscribe to: Posts (Atom)

Popular Posts

  • ကမ္ဘာ့ အန္တရာယ်အများဆုံး တိရစ္ဆာန် (၁၀) မျိုး
    ၁။ ခြင် (Mosquito) ရိုးရိုး အမြင်အားဖြင့် ကြည့်မယ်ဆိုရင် ” ခြင် ဆိုတဲ့ အကောင်တွေက ဘာအန္တရာယ် ရှိလို့လဲ ..? ” ဆိုပြီး မေးခွန်း ထုတ်နိုင်ပါတယ်။...
  • သရဲမွေးတဲ့ ကိုစာကြီး
    ရွာတစ်ရွာ တည်ပြီဆိုရင် “စုန်း” ဆိုတဲ့ အမျိုးကလည်း မပါမပြီးလို့ ကြားဖူးပါတယ်။ ရွာတိုင်းမှာလည်း စုန်း ရှိကြတယ်။ သာမာန် ကြည့်ရင်တော့ စုန်းမှန်...
  • သိမ်ဝင် သပိတ်ကွဲနှင့် အသက်ဝင်လာသော ဘီလူးအင်း
    ဘီလူးအင်း ………။ ဘီလူးအင်း ဆိုတာ လောကီ ပညာရပ် ဖြစ်တဲ့ အင်း အမျိုးအစား တစ်မျိုးပဲ ဖြစ်ပါတယ်။ အင်းကွက် ရေးတယ်၊ အင်းကွက် ဆွဲတယ် ဆိုတဲ့ စကားတွေကို...
  • မည်သူမျှ ဘီအီး မသောက်ရ (တစ်ကြောင်းစာ)
    တစ်နေ့သ၌ သူကြီးဦးခိုင်မှ ၎င်း၏ ရွာသူရွာသားများအား “ည မထွက်ရ” အမိန့်ကို ထုတ်ပြန်လေရာ အချိန်မတော် သန်းခေါင်ကျော် ရွာအတွင်း အော်ဟစ် သောင်းကျန်းလေ...
  • အော် … အချစ် … အချစ် …
    အချစ် … အချစ် … အချစ် ဆေးလိပ်လေး တစ်လိပ်လောက်မှ သောက်မကောင်းတဲ့ အချစ် … မိုးတိမ်တွေ ဖုံးနေတဲ့ ကောင်းကင်ပြာလို အရောင်တွေ လွင့်ပြယ်သွားပြီဖြစ်...
  • ခေါင်းစဉ်မဲ့
    မညှာမတာ ငါ့ကိုယ်ငါပဲ အပြစ်ဖို့တယ် ချစ်တတ်လွန်းလို့ … ခေါင်းခါပါတယ် မုန်းမေ့ဖို့ တွေးလိုက်မိတိုင်း သူ့တံခါးကို အတင်းပိတ်ထားတယ် ရင်ထဲက ခပ်ဆိုး...
  • သရဲကို ထိကိုင်မိခြင်း
    ကျနော်တို့ ရွာမှာပေါ့ …။ ဦးထွန်းမြင့် ဆိုတဲ့ လူကြီး တစ်ယောက်ရှိတယ်။ ရွာရဲ့ ညနေခင်း အချိန်တိုင်းမှာ ဦးထွန်းမြင့်တို့ အိမ်ကို လာနေကျ လူတစ်ယေ...
  • ညီလေးအတွက် ရေးတဲ့ကဗျာ
    ညီလေး … မင်း မိန်းမခိုးပြေးတာ ဘယ်လို ဖီးလ်လာသလဲဆိုတာ ငါ မသိဘူး … ဒါပေမယ့် အဲ့ဒီသတင်းကြားတော့ မင်းအပေါ်ရှိတဲ့ အကိုတစ်ယောက်ရဲ့အဖြစ်ဟာ လျော့ကျသွ...
  • Blog ရေးသားခြင်း၏ အကျိုးကျေးဇူးများ
        ကမ္ဘာပေါ်မှာရှိတဲ့ လူ သန်းနဲ့ချီပြီး အင်တာနက် စာမျက်နှာတွေပေါ်မှာ blog တွေ ရေးကြတယ်။ ကျွန်တော်တို့လည်း blog တွေ ရေးကြတယ်။ ဘာကြောင့် ရေးကြတာ...
  • သရဲ မကြောက်သူများ
    ကျုပ်တို့ရွာမှာဗျာ …. ဦးတင်ဆောင် ဆိုတဲ့ လူကြီးတစ်ယောက် ရှိတယ်။ သူက ကျုပ်နဲ့ အမျိုးစပ်မယ်ဆိုရင် ကျုပ် အမေရဲ့ အဖေ၊ ကျုပ်အဖိုးပေါ့ဗျာ။ အဲဒီ ကျ...

Recent Posts

Blog Archive